Atzokoan, gure erredakzioko lan banaketan, niri zegokidan egunak emandako “guztia” halako inbutu batetik pasatzea eta gertaerarik aipagarrienak-edo artikulu bakarrera ekartzea. Hau da, sindikatuen eta eragile politikoen adierazpenak hautatu eta laburtzea, lanuzteak sektoreka zer nolakoak izan ziren kontatzea, hiriburu bakoitzean zer gertatu zen tanta batez azaltzea, eta horrelako gauzak. Hemen daukazu. Eta hor daukazunez, lizentzia hartzen dut buletin honetan gauza batzuk ez aipatzeko.
Ea, kontua da nik ez nituela begiak leku guztietan izan. Aliatuak nituen, lankideak. Haien artikuluak eta mezuak irakurrita egin ahal izan nuen gertatzen ari zenaren ideia bat. Eta atentzioa eman zidaten erabilitako hitzek, haiek elkarren kronikak artean irakurri gabe zeuzkatela. “Jendetza itzela” erabili zuen Xabier Letonak Iruñeko manifestazioa deskribatzeko. “Alimaleko jendetza Gasteizen”, Zigor Olabarriak. “Azken urteetako grebarik jendetsuena”, Donostiakoaz Lander Arbelaitzek. Eta Bilboko zifra ematen zigun Maria Ortegak, ELAk esana, “70.000 lagun manifestazioan”, eta informalago zioskun lantaldeko kanalean, “infinitu pertsona daude hemen!”.
Agian galdetuko duzu zerk harritzen nauen horretatik guztitik. Normala ez ote den. Kazetariok ez ote ditugun gertakariak puzten, izan direnak baino lodiago kontatzen. Eta are gehiago kasu honetan, ARGIAk ere greba babestu duenean. Baina ez. Ez dira punta banako lau kasualitate izan. Kronika bakoitzean behin baino gehiagotan nabarmentzen da jende mordoa ilusio, grina eta asaldura handiz mobilizatu zela. Eta hori ez da normala, ARGIAn behintzat ez.
Tira, hitzez aparte, argazkiek ondo erretratatzen dute atzokoa. 30 argazkiko bilduma egin dugu, lau hiriburuetan izan baikenituen kamerak: Iruñean Manex, Gasteizen Dos Por Doseko lagunak, Bilbon Pello, eta Donostian Dani. Eta erredakzioko lankide bikainei esker, zentralita lana eginda, zuzeneko jarraipen zoroa txukun gelditu zen.
