Bi alderdiak elkarri mokoka ari dira Bizkaian ustezko ustelkeria kasu banagatik. Getxokoa lehendik dator, Irurak Bat eraikin historiko eta babestua 2024ko udan eraitsi zutenetik. Eraisketaren inguruko irregulartasun zantzuak lehendik ere bazeuden, baina horrez aparte, denboraren poderioz jakin da eremu horretan luxuzko etxebizitzak egin nahi zituen sozietateko bazkide zirela EAJko bi zinegotzi. Epaileak bi horiek eta beste zinegotzi bat inputatu ditu, eta dimisioa eman dute. Baina Amaia Agirre alkatearen kargugabetzea ere eskatzen du oposizioak. Eta hain justu, gaur, osoko bilkura dute udaletxean. Bero-beroa espero da, EAJren eta PSE-EEren udal gobernua gutxiengoan egongo baita, ez baitago denborarik EAJko ordezko hiru zinegotzien tramitazioa egiteko. Beraz, oposizioak izango du hitza, baldin eta adostasun batera heltzen badira EH Bildu, PP eta Elkarrekin Podemos. Koalizio subiranistak proposatuko du, ohiko gobernu bat beharrean, alderdi guztien ordezkaritza kontutan hartuko duen udal batzorde berezi bat sortzea, eta horrela funtzionatzea hurrengo hauteskundeetara bitartean.
EH Bilduren erasorako abagune hori kamustu du Zaldibarko notiziak. Auziak lotura du zabortegiaren hondamendiarekin. Ikerketa honetan Arantza Baigorri alkate ohi abertzalea seinalatu dute, lur eremuaren antolaketari loturiko irregulartasunak atzeman zirelako 2023an, Joaquin Beltran eta Alberto Sololuzeren heriotzak ikertzen eta hondamendiaren ingurumen kalteak aztertzen ari zirenean. Itxura guztien arabera, Zaldibarko zabortegiko kudeatzaileek zegokiena baino lur eremu dezente zabalagoa erabiltzen zuten, eta gainera, urbanizatu ezin zen leku bat erabiltzen zuten zaborra pilatzeko. Ikerketa daraman magistratuaren esanetan, Baigorri alkateak bazekien edo jakin behar zuen hori.
EAJ eta EH Bildu, biak parez pare jarri dira balizko ustelkeria kasu banaren parean. Baina ezin elkar gehiegi zikindu, ezin elkar gehiegi presionatu, norbere ipurdia benetan babespean dagoela ziurtatu arte.
