Egun on.

Ostiral berezia gaurkoa guretzat. 37. urtez banatuko ditugu euskarazko komunikazioaren eta kazetaritzaren Argia Sariak. Bazkalondoan hasiko dugu ekitaldia, eta gutxi gorabehera 17:00etan jakinaraziko ditugu aurtengo saridunak. Sei sari dira: entzunezkoa, ikus-entzunezkoa, prentsa, internet, komunikazio kanpaina eta merezimenduzkoa. Ekitaldia bideoz grabatuko dugu, eta 20:00etan eskegiko dugu argia.eus-en, ikusi nahiko bazenu.

Egun goxoa izaten da guretzat eta gure sektorearentzat. Egunean jarri, jendea zertan dabilen jakin, eta beti ateratzen dugu zerbait topaketa horretatik. Eta hunkigarria ere bada, ARGIAren harpidedun izaten 50 urte baino gehiago daramatzaten lagun batzuk ere mahai baten bueltan bilduko baititugu. Momenturik onenetan eta txarrenetan babestu gaituzten haiei, eskerrik asko.

Asteko azken buletina. Goazen mamira.

Akats larriak Osakidetzan

Ez da txantxetarako kontua, ez baitirudi giza akatsa dagoenik atzean. Nola da posible iraungitako txertoak jartzen aritzea eta orain arte inor ez jabetzea? Nola egin dute huts kalitate-kontrolek? Eta zergatik horrelako zifra-dantza?

Ez da normala bi egunen tartean hiru prentsa agerraldi egitea Osasun sailburuak. Urduritasuna, kezka eta egoeraren larritasuna adierazten du horrek. Gainera, aldiro, aurretik emandako informazioak gezurtatu ditu. Hexabalente txertoaz soilik mintzo ginen atzo gauera arte. Hasieran, 253 pertsona ziren iraungitako dosia jaso zutenak; gero, 103; eta azkenean, 30. Eta hasiera batean ez zen ezer pasatzen, ez zegoen berriz txertoa hartu beharrik. Baina gero bai: txertoa hartzera bultzatu ditu “lehenbailehen”. 

Atzo, sorpresa: beste bi txerto mota ere iraungita zeuden eta dosi batzuk ipini dira. Tetrabalente eta hirukoitz birikoaren txertoak dira. Eta, estimazioen arabera, kalteturik egon daitezkeenak 78 pertsona dira. Baina “lasai” egoteko esan du Alberto Martínez sailburuak, ez baitago “ondorio kaltegarririk duen inor”. 

Jarraipen batzorde berezi bat sortu du Osasun Sailak, nahiz eta orain arte “egin zitezkeen kontraste zientifiko eta sanitario sakonenak” egin dituzten. Ez du konfiantza askorik ematen, baina. Zorionez ez dago inor larri, iraungitako txertoek ez dute kalte askorik eragin, baina osasun sistemak bizi duen krisiaren adierazle argia da. Fiskaltzak ikerketa ireki du bide penaletik.

Kazetaritza independentea estimatzen baduzu, animatu proiektua babestera.
EGIN ARGIAKOA

Getxo eta Zaldibar (II)

Balizko bi ustelkeria edo irregulartasun kasuen bigarren kapitulua. Titularra: gotortu egin dira EAJ eta EH Bildu. 

Bilkura beroa izan zuten atzo Getxoko udaletxean, oposizioa batu egin baita EAJ eta PSE-EEren udal gobernuaren aurka. Amaia Agirre alkate jeltzalearen dimisioa eskatzen duen mozio bat onartu dute Elkarrekin Podemosek, EH Bilduk eta PPk, baina gisa horretako mozio bat iradokizun moduko bat da, eta ez du besterik eragiten. Alkateak, badaezpada, argi utzi ditu gauzak: “Ez dut dimitituko”. Kargugabetzea benetan gertatzeko, ezinbestekoa litzateke oposizioa ados jartzea eta zentsura mozio bat aurkeztea. Baina ez dirudi posible izango denik.

Bestalde, EH Bilduko alkate ohi bat zipriztintzen duen Zaldibarko zabortegiaren kasuaz, balizko ustelkeria kasu guztiak baztertu ditu Arnaldo Otegik. Radio Euskadin egin dioten elkarrizketan esan du Arantza Baigorri alkateak ez zuela “inolako interesik”, EH Bildu “beti” egon dela zabortegiaren “aurka”, eta Baigorrik baimenak sinatu zituela udaleko eta diputazioko “teknikari guztien” gomendioak jarraituta.

. . . . . . .

Portzierto. Ustelkeria zantzurik ez, baina etika ukitzen duen asunto bat esklusiban argitaratu digu gaur Estitxu Eizagirre lankideak. Guillermo Allende, egungo Eusko Jaurlaritzaren Deskarbonizazio zuzendaria, Iberdrolako apoderatua izan da hamarkada batez. Eta ez aspaldi: Iberdrolari lotuta egon da Jaurlaritzako kargua duela urtebete pasatxo hartu zuen arte. 

Bera arduratzen da proiektu eoliko eta fotovoltaikoak aztertzeaz, enpresei baimena eman edo ez erabakitzeaz. Eta azken urteotan bada enpresa-elkarte bat proiektu dezente aurkeztu dituena: Aixendar SA. Bi bazkide ditu: bata Iberdrola, eta bestea Energiaren Euskal Erakundea, Eusko Jaurlaritzarena dena. Horrek baditu azpi-enpresa batzuk; horietako baten administrazio kontseiluko kide da Allende.

·····>   Ez galdu hauek
  • Hizkuntza gutxituen topaketak. Asteburuan, bilkura internazionalista egingo dute Baionan. Euskal Herriko ordezkaritzaz aparte, Bretainiako, Ipar Kataluniako, Korsikako eta Okzitaniako hainbat aktibista elkartuko dira. Euskal Herrian Euskarazek antolatu ditu topaketak, eta otsailaren 5ean epaituko dituzten EHEko kideei elkartasuna adieraziko diete. 
     
  • Turismo datuen interpretazioa. Eustat-ek emandako datuen arabera, Donostiako hotel-sarrerek %1 egin dute behera. Komunikabide askoren lerroburuak hartu ditu zifra horrek, edo turismoa jaisten ari den ideia horrek, baina Bizilagunekin herri plataformak bestelako irakurketa bat egin du: azken hamarkadako ikuspegia hartuta, hotel-sarrerak %76 hazi dira.

Webgunetik sartu zara, lagun batek pasa dizu, eta ez zaude buletinera harpidetuta? Eman izena.

ASTEKO KOORDENADAK >>
 

Asteko tendentzien bildumatxoa egingo dut ostiralero, iparrorratza hartuta, asteburuko solasaldi informaletan ez zaitezen galduta sentitu. Lau irakurgai edo entzungai proposatzen dizkizut.
  • I > Ituna. Traktoreak ez daude asfaltoan besterik gabe. Gauza asko jarri dituzte mahai gainean, baina batik bat Europak Mercosurrekin izenpeturiko akordioa da seinalatzen dena. Kontsumitzailearen ikuspegitik, ustezko “alde on” eta “txarrak” pantailaren bi aldetan bereizi dizkigute telebistan; baina zer dago itunaren atzean? Elikaduraren merkatu globalaz eta, batez ere, bizitzaren antolaketa politikoaz gogoetatzeko ideia batzuk ematen ditu Mirene Begiristainen idatzi honek.
  • H > Halal. Kokaina kontsumoa eta trafikoa izugarri handitu omen da Lapurdiko kostaldean. Hori dio Pirinio Atlantikoetako prefetak. Kazetariek haien begiekin ikus dezaten, “terrenora” eraman dituzte Baionan, droga brigaden atzetik. Spoiler: halal harategi baten kanpoaldean egin dute eszena. Berria-ko kazetari Leire Casamajou bertan egon da, eta beldurgarriki ongi kontatu du artikulu honetan.
  • E > Euskara. Migranteak ez direla integratzen, ez dutela euskara ikasten, ez direla hemengo kulturara moldatzen… Laura Penagos aktorea sortzez kolonbiarra da, Nafarroako Larunbe herri txikian bizi da, eta euskaraz ederki asko egiten du; iritzigilea da gurean. Baina hala ere, bazterreko kategoriakoa izaten segitzen du. Egiazko egurra banatu du, egur zintzoa.
  • M > Maroko. Umetan jaioterria utzi, eta bidaia luze baten ostean, bakarrik, Euskal Herrira heldu zen Omar Akallach. Bederatzi urte igarota, aukera izan du orain etxera itzultzeko. Horren testigu izan zen Maria Ortega lankidea, berarekin egin zuen Marokora bidaia, eta erreportaje benetan ederra idatzi eta irudiz kaptatu zuen. Azala eskaini genion gaiari pasa den asteko astekarian. Aste honetan Euskadi Irratian egon da, eta hogei minutu pasatxoan, goxo-goxo kontatu ditu idatzira eraman dituenak eta ez dituenak.

Honaino gaurkoa. Eskerrik asko buletinaren lehen aste honetan hor egoteagatik.

Asteburu ona izan. Besarkada bat.

Gure hizkuntzak funtsezko ditu euskara hutsean funtzionatzen duten proiektuak.
BABESTU EUSKARA, 
EGIN ARGIAKOA

JARRAITU SAREETAN