Egun on.

Sare sozialen debekua... Hau emaila da. Hau ez dute geldituko.

Goazen mamira.

Sareen aurka, zeren alde?

Australiaren esperientziari segituta, aurreko astean iragarri zuen Frantziak 15 urtez azpikoei sare sozialetarako sarbidea debekatuko diela, eta oso antzerako zerbait egingo du Espainiak orain: muga 16 urtetan ipini du. Hortaz, Euskal Herriko 15 eta 16 urtez azpiko haur eta nerabeei galarazi egingo zaie sare sozialak erabiltzea. 

Onddoak bezala ugaltzen dira gauza batzuk politikan: modan jartzen dira, eta bat-batean aplikatzen dira, estatuen arteko lehia bailitzan, atzean geratzeko beldurrez-edo. Ea: kasu honetan badirudi gauza onak ekar ditzakeela. Baina tira. Halakoei askotan bigarren buelta bat falta izaten zaie. Hasteko, ongi pentsatu gabe dago legea nola beteko den. Eta nire ustez inportanteena, zeren aldeko politikak egingo diren gero. Espazio digital osasuntsuak sortzeko imintziorik ere ez da sumatzen.

Ipar Euskal Herrian, neurria konplizeko ardura erabiltzaileak (eta gurasoak) izango du. Hego Euskal Herrian, oraindik, behin betiko letra txikia ezagutzetik urrun gaude; ohi moduan, ezer baino lehen ideia ospatu baitu Espainiako Gobernuak. Baina ulertzera eman dute plataformak “zigortuko” dituztela. Nola? Australiaren antzera? Australiari ongi irten zaio plataformei isun potoloekin mehatxu egitea. 

Legearen detaileak fintzeko daude oraindik eta tertulia ordu askoko egunak datoz aurretik. Interesgarri suertatu zait niri benetako aditu bat entzutea, Telmo Lazkano, osasun digitalaren arloko aholkularia. Mikel Garciak telefonoz hots egin zion atzo, notizia ezagutu orduko.

A. Ez dugu alferrik zabaldu ARGIAn Hezkuntza kanal berezia: horrelako eduki interesgarri eta dibulgatzaileekin ari gara hornitzen. Teknologiari, mugikorrei eta asunto horiei guztiei lotuta, irakurgai batzuk proposatzen dizkizu Mikelek. Egin klik irudian eta saltseatu.

13/13: epaileak epaile, oraindik ere

Urrian, 15 urte beteko dira ETAk armak behin betiko utzi zituenetik, baina estatuko aparatuen mendeku gosea ez da desagertu. Atzo arratseko notizia da horren adibide: espetxean sartzeko hamar egun eman dizkiete Arantza Zulueta eta Jon Enparantza abokatuei. Lehenari zazpi urteko kartzela-zigorra ipini zioten, eta lau urtekoa bigarrenari. “Talde terroristako kide” izatea leporatzen zaie, ETAren “fronte juridikoa” osatzea, ETAko kideen “defentsa juridikoan” aritzea, eta zuzendaritzarekin “lotura lanak” egitea, besteak beste. Zuluetari, Enparantzari ez bezala, lehergaiak edukitzea ere egotzi zioten.

13/13 sumarioko zortzi kidetatik bi dira Zulueta eta Enparantza. 2022an egin zen epaiketa, eta irregulartasun zantzu ugari salatu ziren. Ehun legelarik manifestu bat sinatu zuten fiskaltzaren jarrera deitoratzeko, eta zuzenbide penala modu “objektiboan” interpretatzea eskatzeko. Baina errudun jo zituen Auzitegi Nazionalak. Helegiteen prozesuak luze jo du, baina duela hilabete eskas Auzitegi Gorenak berretsi egin ditu Zuluetaren eta Enparantzaren kontrako zigorrak, eta esan du “frogatutzat” jotzen dutela biak ETAn “erabat integratuta” zeudela. Orain, Auzitegi Nagusiak dei egin die Zuluetari eta Enparantzari espetxera joateko.

·····>   Ez galdu hauek
  • Alarde baztertzailean eraso matxista. Hori egotzi diote Irungo alarde baztertzaileko buruetako bati. Bilera bat egin dute, zigorra jarri diote gizonari, eta hara non, hura babesteko elkarretaratze bat egin duela gizon kuadrilla batek. 
  • EAJ, etxejabeak babesten. Alokairua ordaindu ezin duten familia zaurgarriak kolpetik etxerik gabe ez uzteko neurri bat badu Espainiako Gobernuak: etxejabeek ezin dituzte kaleratze bizkorrak egin. Baina EAJk exijituta, ñabardura bat egin diote arauari: ez bada “etxejabe handia”, alegia, etxe bakarra badu alokairuan jarrita, lege hori betetzetik salbuetsita gelditzen da. EAJk dio haien errealitatea ez dela funts putreena bezalakoxea, ezin direla pack berean sartu. Eta gobernu “progresistak”, amen-amen.
  • Mexiko eta Kuba. Venezuela erasotu eta presidentea bahitu zutenetik, AEBek gauzak estutu dizkiote Kubari; besteak beste, petrolioa erostea asko zailduta. Mexikok laguntza humanitarioa eman dio Kubari, eta egoera hobetzen lagunduko diola hitzeman dio.

Kazetaritza independentea estimatzen baduzu, animatu proiektua babestera.
EGIN ARGIAKOA

AGENDA KULTURALA
 

Beti daude makina bat plan egiteko, baina askotan ezin aukeratu. Epe motzean datorren guztiaren ganorazko entresaka bat egiten ahaleginduko naiz asteazkenero, gaindosirik gabe.
  • Musika. Afixa dotorea dute ostiralez Heletan, jaiak baitira: Süne, Xabi Solano, Dizkobolo eta DJ Musikalan ariko dira giroa berotzen. Eta ostiralez baita ere, Gasteizko Jimmy Jazzen, gazteen artean bogan dabiltzan bi: TOC eta Kiliki. Larunbatean, bestalde, Baionako Zizpa gaztetxeak urteurreneko ekitaldien egun handia izango duenez, eskaintza oparoa dute Odei, Beleme, Kalume, Ezezez eta Tekkrew taldeekin. Beste aukera eder bat Irunen, Verde Pratoren kontzertua. Edo Bilboko Kafe Antzokian, gerria mugitu nahi duenak, Goxua’n salsa. Eta Bilbon, baita ere, musika klasikoa gogoko dutenentzako plan ederra: Tchaikovsky-ren bosgarren sinfonia joko du Bilboko Orkestra Sinfonikoak. 
  • Antzerkia. Gaur, Kandida antzezlana taularatuko du Tartean teatroak Bilboko Arriagan. Ostiralean, Desobedienteak 18/98 Beasainen, eta larunbatean Hil da jainkosa Lekeition. Larunbatean ere, Urruñan, Altxalilik bere show-a egingo du. Garaiari lotuta, hiru hauek aipagai: libertimendua dute ostiralean Ortzaizen eta igandean Donapaleun. Eta maskaradak igandean Muskildin. Izan ere, Inauteriak bete-bete datoz egunotan, eta nabarituko da herri ugaritan: ikusi agenda.
  • Bertsolaritza. Ostegunean, Iruñeko Bertsoaroaren barruan, jaialdi ederra dago Nafarroako eta Gipuzkoako finalista ugarik osatuta. Larunbatean, bertsolari gazteen Abra saria jokatuko da Getxon, Oionen hasiko da Arabako bertso txapelketa, eta jaialdi berezia dute Zestoan, Uxue Alberdiren Esne-berriketan liburuan oinarrituta.
  • Literatura. Donapaleun, bihar, Otsail Ostegunen karietara, Joseba Sarrionandia ariko da Poskolonialismoa liburua aurkezten. Bihar, Getxon, Esnatu ala hil aurkeztuko dute Iñaki Iurrebasok eta Garikoitz Goikoetxeak; eta gauza bera Gasteizen, IAK kulturgunean, datorren asteartean. Horrez gain, larunbat honetan hasita, eta hurrengo asteazkena bitartean, Lurdes Iriondori buruzko hiru saio interesgarri antolatu dituzte Zornotzan: ipuin-kontaketa, liburu aurkezpen eta dokumentalaren emanaldia. Eta gaur zortzi, hau da, otsailaren 11n, Iruñeko Laban, Euskal artearen berrikuspen feminista deituriko hitzaldia eskainiko du Ane Lekuonak.

Honaino gaurkoa.

Asteazken ona izan. Besarkada bat.

Gure hizkuntzak funtsezko ditu euskara hutsean funtzionatzen duten proiektuak.
BABESTU EUSKARA, 
EGIN ARGIAKOA

JARRAITU SAREETAN