Egun on.

Heldu da ostirala. Otsailak 6 ditu gaur.

Goazen mamira.

Faxistak kontratatzeko inpunitatea

Ez dakit zein momentutan iritsi garen normaltzat hartzera, faxistei deitzea, alokairuan daukazun bigarren edo zortzigarren etxebizitzatik maizterra kaleratu dezaten. Gero eta ohikoagoa bihurtu da kontua. Espainiako ustezko gobernurik progresistenak onartu egiten ditu desokupazio-enpresak, eta euskal gaixo progresistok ere bai, gero eta normalizatuago ditugu. Bestela ez lirateke hainbeste faxista gure kaleetan ibiliko, alokairuaren prezio jasangaitzei aurre egin ezinda dabiltzan familiak euren etxetatik kaleratzen, edo haien etxeko atea jo eta izua eragiten. Biktima asko emakumeak dira, eta gehienak ama bakarrak. 

Duela hamar egun eskas egin zuen Euskal Herriko Etxebizitza Sindikatu Sozialistak “alerta antifaxista”, DesokupaCyl deituriko enpresa faxista Bizkaian esku hartzen ari zelako azkenaldian. Barakaldon, Zornotzan, Berangon eta Bilbon, besteak beste. Azken astean, Lasarte-Orian eta Donostian ere ikusi ditugu faxista horiek. Beraiek igotzen dituzte bideoak sare sozialetara, propaganda egiteko, non dauden jakinarazteko.  

Faxistak dira, agindu judizialik gabe, etxeko atea jo eta alokairua pagatzera heltzen ez diren familiak kaleratu nahi dituztenak. Orduan… Nola deitu behar zaie “zerbitzua” kontratatzen dutenei?

[Goiko irudia iragan azarokoa da, Pello Maudok egina; desokupazio-enpresa batek Bilbon etxegabetze bat gauzatu nahi zuen, baina jendearen protestak galarazi zuen]

Kazetaritza kritikoa estimatzen baduzu, babestu proiektua.
BABESTU ARGIAKOA

Frantzia linguizida

Biba Euskal Herrian Euskarazekoak. Epaiketa zuten atzo Baionako Auzitegian, iragan irailean “Euskaraz bizi nahi dugu” zioen pintaketa egin zutelako Departamentuaren egoitzaren horman. Ez da gisa bereko ekintza egiten duten lehen aldia. Eta epaiketan ere berdin jokatu dute: euskaraz deklaratzeko eskubidea aldarrikatu dute lau auziperatuek, baina epaileak ez die onartu. Eta kasurik egin ez dienez, Frantziako Poliziak aretotik kanporatu egin ditu.

Esana zuten eta behin baino gehiagotan egin dute eskaera berbera: epaileak euskaraz ez badaki, ipini dezatela itzultzailea. Baina frantses estatu zentralistari ez zaio ideia gustatzen. Atzoko epaiketakoa are irrigarriagoa izan da: lau kidetatik hiru Hegoaldekoak zirenez, gaztelaniara itzultzeko aukera eman diete.

·····>   Ez galdu hauek
  • Flotilla berria. Global Sumud Flotillak misio berria du: martxoaren 29an irtengo dira Mediterraneoko hainbat puntutatik, hala nola Bartzelonatik. Eta paraleloki, lurretik, karabana humanitario bat ere joango da, Egiptotik sartzeko. Inoizko jende gehien mobilizatuko da: 1.000 osasun langile, hezkuntza arloko profesionalak, ingeniariak, gerra-krimenen ikertzaileak eta nazioarte behatzaileak.
  • Mutilazio genitala. Soilik Nafarroan, 4.000 emakume inguru daude mutilazio genitala jasateko arriskuan. Gaur da horren aurkako nazioarteko eguna, eta bezperan egin du ohartarazpena Nafarroako Munduko Medikuen Elkarteak: oraindik ere milaka emakume daude biolentzia hori jasateko arriskuan.
  • Festa Urdaibain. Herritarren garaipena ospatzeko eguna dute biharkoa Gernika-Lumon, Guggenheim Urdaibai Stop herri plataformak antolatuta. Egun osoko egitaraua dute: elkartasun azoka, umeentzako tailerrak, hitzaldi eta proiekzioak, mosaikoa eta argazkia, herri bazkaria… Gauean kontzertua: Sua eta Lukiek.

· · · · · · ·

Portzierto. Ez dakit badakizun: ekonomia sozial eraldatzailean sinesten duten kooperatiben sareko kide gara, Olatukoop-en partaide da ARGIA. Eta oraintsu hasi gara podcast saio batzuk egiten, Pikutara Darwin, taldeko kooperatibak eta haien balioak ezagutzera emateko. Lehenbiziko saioan Itsasura egin eta Hemen kooperatiba ezagutzeko parada izan dugu. Duela mende erdi sorturiko kooperatiba da, herrikoentzat herrian lana lortzea sustatzeko.

ASTEKO KOORDENADAK >>
 

Asteko tendentzien bildumatxoa egingo dut ostiralero, iparrorratza hartuta, asteburuko solasaldi informaletan ez zaitezen galduta sentitu. Lau irakurgai edo entzungai aukeran.
  • I > Itxaropena. Ustekabean egin topo artikulu honekin: Jean-Louis Davant jaunak erretreta iragarri du Enbata-n, idazki eder baten bitartez jakinarazita. 90 urte bete zituen iaz. Eskerrak eman dizkio irakurle, jarraitzaile eta bidaide izan duen orori, eta kritika egin dio ikusten ari den munduari. “Munduko buruzagi handinahi, anbizios, urgulutsuek noiz ote zentzatu behar dute?”. Baina artikulua bukatzen du Barkoxeko gazteei omenaldia egiten, pastoral eder horrengatik. “Esperantza begiratu nahi dut”.
  • H > Hamaika. Hamaika gauza nola egiten diren azaltzeko erreportaje-sorta bat egiten ari da Hamaika Telebista. Lagun batek gomendatu zidan. Nola egiten da? izena du saioak. Ordu erdiz azpiko bideoak dira. Adibidez, Nola egiten da liburu bat?. Liburu bat argitaratzearen prozesu guztia kontatzen du Txalapartako lantalde jatorrak.
     
  • E > EHZ. Aurten 30 urte beteko ditu Euskal Herria Zuzenean festibalak, eta iragarria zuten moduan, urte osoa jantziko dute argitalpenez: liburua eta dokumentala (goiko argazkia horren adibide) berantago helduko dira, baina asteon hasi dute podcastaren emisioa. Uhinen ildoan du izena, Arrosako zolan kantuak dioen moduan, Arrosan ernaldu baitzen EHZ. Lehen kapitulua argitaratu dute, 27 minutukoa, festibalaren oinarrizko balioen berri emateko.
  • M > Mesfidantza. Segituan pizten eta segituan itzaltzen dira su batzuk nazioartean. Groenlandiakoa da horietako bat. Azken astean deus hitz egin da Groenlandiaz, baina hango jendea ez dago batere lasai, mesfidantzaz begiratzen baitiete AEBei. Hango hiriburuan, Nuuken dago Vilaweb hedabide katalaneko Oriol Bäbler kazetaria, eta oso kronika lurtarrak egin ditu handik. Berria-k euskaratu dizkio. Adibidez, hemen kontatzen dituenak, hango bizimoduari eta eguneroko kezkei buruzkoak, interesgarri egin zaizkit.

Honaino gaurkoa.

Asteburu goxoa izan. Besarkada bat.

Gure hizkuntzak funtsezko ditu euskara hutsean funtzionatzen duten proiektuak.
BABESTU EUSKARA, 
EGIN ARGIAKOA

JARRAITU SAREETAN