Espainiako Estatu mailan, greba egingo dute Renfeko makinistek gaur, bihar eta etzi. Eta Hego Euskal Herrian eragina izango du Euskotren ez beste zerbitzu guztian. Puntako orduetan ohiko trenen erdia pasatuko dira, eta gainontzean laurdena.
Hari mutur asko elkartu dira greba egun hauetara heltzeko. Nagusiki, abiadura handiko trenbide sarearen mantenua da arazoa: geroz eta tren-zerbitzu gehiago, eta azkarrago joaten badira gainera, orduan eta zaintza gehiago behar dute errailek. Baina mantenu-inbertsioak ez dira behar beste egin Espainian. Horren apunteak hartu behar lituzkete EAEko gobernuek. Gauza on bat omen du, behintzat, EAEko AHT-a hainbeste atzeratzeak: teknologia hobetzen ari dela, eta segur aski geure AHTa “hobea” izango dela.
Orain, benetako beldurra sortu du Espainian abiadura handiko trena erabiltzeak, eta gobernu progresistak fitxa mugitu du: dirua mahai gainean jarrita, hainbat hegazkin konpainiek Madril eta Bartzelona arteko zerbitzua zabaldu dute “puntualki”. Ordubeteko bidaia da; ziur denbora gehiago igarotzen dela aireratzen eta lurreratzen. Frantziak duela hiru urte galarazi zituen horrelako hegaldi laburrak, baina neurri sinbolikoa izan zen, eraginkorra baino gehiago. Tira. Banketxeek sekula galtzen ez duten bezalaxe, hegazkin-konpainiek ere ez: Madril eta Bartzelona artean ez dira ohi bezainbeste tren azkarrik izango gaur, eta hegazkin-txartelak, ganorazko ordu batean, 230 euro balio dituela ikusi dut.
- Kataluniako Rodalies tren zerbitzuarena beste mundu bateko asuntoa da: askoz ere okerrago funtzionatzen du. Atzerapen handiagoak, istripu gehiago, eta akats teknikoak biderkatu egin dira azken asteotan. Eta protestak ere bai. Asteburuan bi manifestazio jendetsu egin dituzte Bartzelonan: bata, erabiltzaileen plataformak deiturikoa, alderdi politikoek ere parte hartu dutena; eta bestea, ANCk deitua. Aldarria: “Errail bakarra dago, independentzia”.
