Egun on.

Hemen da asteazkena.

Goazen mamira.

Sidenor, Israelen konplize?

Espainiako Auzitegi Nazionalak poliziak bidaltzen dituenean ikuskapen edo miaketa bat egitera, normalean mesfidati (edo haserre ere bai) begiratzen diogu. Baina azken hau ez da kasua izan, eta adierazgarria da hori. Sidenorren Basauriko lantegia miatu zuen atzo arratsaldean Espainiako Poliziak, 2024an eta 2025ean Israelgo armagintza enpresa handienetako batekin egindako negozioen informazioa hartzeko.

Negozioen barnean ez dago irregulartasunik, ez komisiorik eta ez atentzioa eman behar ligukeenik ere. Israelgo enpresa horrekin tratuak egite hutsa da legez kanpokoa izan daitekeena, enpresa horrek parte hartzen duelako Israelgo estatu sionistaren praktika genozidetan, eta Espainiako Gobernuak legez galarazita dauka Israeli armak saltzea. Auzitegi Nazionalak, horregatik, ikerketapean dauka Sidenor, tartean Jose Antonio Jainaga jabea, Espainiako Estatuko ehun aberatsenen artean dagoen gizona; EAJren bueltakoa da, eta iaz Korta saria jaso zuen, Jaurlaritzak urtero enpresari nabarmenduei ematen dien saria. Gizon boteretsua, duda gabe. 

Bada, epaileak susmoa du Jainagak bazekiela Israelgo armagintza enpresa horrek genozidioa egiteko erabiliko zituela Sidenorri erositako altzairuak. Hortaz, kontrabandoa leporatzen zaie Sidenorreko buruei, eta gizateriaren kontrako delituaren konplize izatea ere bai.

Sidenorrek esan du Poliziak ez duela bere bulegoan “miaketarik” egin, baizik eta “informazio bila” joan dela, eta enpresak “lagundu” egin diola bilketa horretan. Tira. Ez didazu esango ez denik graziosoa gertakarien perspektiba hori.

Kazetaritza kritikoa estimatzen baduzu, animatu proiektua babestera.
EGIN ARGIAKOA

Hezkuntza ‘fight’

Zeresana ematen jarraitzen du Bizkaiko hamabi ikastetxeren fusioaren kontuak. Eusko Legebiltzarrean ez zen giro izan aurreko ostiralean. Eman eta jaso aritu ziren Hezkuntza sailburu Begoña Pedrosa, eta parean, haserre, plantatu zitzaizkion EH Bilduko Ikoitz Arrese eta Sumarreko Jon Hernandez. Oposizioa ere ez pentsa erabat-erabat bat eginda zetorrenik, baina beno.

Ezkutuan eta aldebakarrez jardutea egotzi zioten sailburuari, informazioa ezkutatzea eta ez partekatzea, eta fusioen notizia hedabideetatik jasotzea. Zeren, EH Bilduk dio, duela urtebete adostu zutela eskola-mapa moduren batean berregokituko bazen, era kolektiboan egingo zutela. Pedrosak erantzun: “Inongo momentuan ez dugu hezkuntza zentrorik itxiko”. Parentesien unea ñabardurentzat: integrazio kontzeptua darabil Jaurlaritzak, integratzea omen da-eta zentro batean gelditzen diren ikasle apurrak aldamenekora halabeharrez pasatzea. 

Enpin. Ez da nolanahiko eztabaida. Ostiralean kameren aurrean gertatu zen, atril baten bidez, batak hitz egin eta besteak erantzun, kopletan nola, arantzatsu. Horiek diferituan entzun ditu Mikel Garcia lankideak, eta gertatu zen bezalaxe ekarri ditu artikulura, fight baten moduan.

·····>   Ez galdu hauek
  • 10 urtetan, 700 langile hildako. Iaz, 84 langile hil ziren Euskal Herrian, gehienak eraikuntzan, garraioan eta basogintzan. Eta urtebetean, ia 100.000 lan istripu deklaratu dituzte enpresa eta mutualitateek. Horiek denak sarri kexu diren “absentismoaren” zifra itxuraz ikaragarri horren barruan daude.
  • Zaballa. Beste preso bat hil da Arabako espetxean, 35 urtekoa. Osasun laguntza eskatu zuen gauean, ukatu egin zioten, goizean artatuko zutela esanda, baina egunak argitzerako berandu.
  • Kuba. Trumpen blokeoaren erruz, erregairik gabe geratzeko zorian dela dio The Financial Times-ek: astebeteko marjina omen du. Herrialdearen %67 argindarrik gabe geratzear dela diote nazioarteko beste hedabide zenbaitzuk; hara joateko hegazkinak, behintzat, ez dabiltza. Protestak hedatzen ari dira AEBetan. Besteak beste, Susan Sarandon eta Mark Ruffalo aktore ezagunak demokratek eta progresistek deituriko mobilizazio batzuetara batu dira.

AGENDA KULTURALA
 

Inauterietan bete-betean sartuta, datozen zazpi egunetan datorrenaren berri izan nahi baduzu, entresaka bat ekartzen dizut.
  • Musika. Bost proposamen ditut, denak ere maparen goialdean kokatuta. Hasteko bihar, ostegunez, Arrasateko gaztetxean, rap musikarekin gozatzeko aukera aparta: Ahuen. Ostiralean Bilboko Santana aretoan, berriz, bueltan den artista ezaguna, Iseo eta Dodosound. Ostiralez baita ere, Donostiako Dabadaban, Bele. Eta azken bi ideiak larunbaterako: Berrizko Hiltegixen, Lukiek talde mungiarraz gozatzeko parada, eta Donibane Lohizuneko Tanka aretoan, berriz, Neomak oholtzaratuko da.
  • Antzerkia. Inauteriak bete-betean. Garaiko bost hitzordu. Maskaradak larunbatean Pagolan izango dira, eta kaskarotak Lekuinen. Igandean, mutxikoak Senperen, eta libertimendua Donibane Garazin. Eta igandean baita ere, Iruinkokoa izango dute Iruñean. 
  • Bertsolaritza. Gure Irratiaren aldeko bertso afaria dute ostiralez Baionan, Amets Arzallus eta Maialen Lujanbiorekin. Eta afaririk gabe, baina Antzoki Zaharreko butaka ederretan, Inauterietako jaialdia dute Donostian, Miren Artetxe, Jon Maia, Alaia Martin eta Andoni Egañarekin. Eta igandean, berriz, Arabako txapelketaren bigarren final laurdena jokatuko da Laudion, sei bertsolariren parte hartzearekin. 
  • Literatura. Edo literaturari bueltako solasaldietan, hainbat kontu. Esaterako gaur, Gasteizko Liburutopian, Hedoi Etxartek Izen baten promesa eleberria aurkeztuko du. Bihar, Donapaleuko Otsail Ostegunen parte, zuzenbide publikoan doktore Pauline Guellek hitzaldia eskainiko du estatuen inpunitateaz eta torturaz. Gaur, Iruñeko Laban, Memoria, paisaia eta identitatea izenburupean hitzaldia emango dute Amaia Molinet eta Oihane McGuinness artistek, eta ostiralean, leku berean, Yolanda Arrietaren liburuan oinarrituta, Arrietak eta Peru Galbetek literatur-musikatu formatuko eszenaratzea egingo dute, Etxe bat deiturikoa. Larunbatean, berriz, Baionan, Kontseilu Sozialistak antolatuta, hainbat hitzaldiz beteriko “egun antifaxista” egingo dute. Eta gaur zortzi, Azpeitiko Dinamoan, Ane Zubeldia idazleak Apoa liburua aurkeztuko du. 
  • Zinema. Eguraldi euritsuaz etxe giro egongo denez, hainbat proposamen. Gaurtik aurrera, Primeran plataforman duzu ikusgai Karmele pelikula. Ekintza herrikoiagoa nahi baduzu, ostiralez, Senperen, Asisko Urmenetaren Sorgina banaiz proiektatuko dute. Eta Hegoaldeko zine komertzialetarako hiru apunte: zinemetan da Tre ciotole, festibaletan-eta ongi mugitu den pelikula, barrenak hunkitzen dituena; asteburu honetan helduko da Historias del buen valle dokumentala, Herrialde Katalanetako landa-eremuan filmatua, gordina eta ederra; eta asteburu honetan ez, hurrengoan ailegatuko da O agente secreto.

Honaino gaurkoa.

Egun ona izan. Besarkada bat.

JARRAITU SAREETAN