“Eskubidea daukat, eta ez dut galderarik erantzungo”, esan du Cerdanek, hasteko. Berehala heldu dira lehen baina-k. Eta galdera guztiei erantzun die azkenean.
Belateko tunelei zegozkion kontu guzti-guztiak ukatu ditu, orain arte Espainiako prentsan atera diren hainbat gauza ere bai, baina finean, esperotakoa horixe zen, epaileren batek kontrakoa frogatzen ez duen bitartean, errugabea baita. Konturik interesgarrienak ohiko galderen ondoren hasi dira, Cerdanek zera bota duenean: “Hau guztia zuek sortu duzue [UPNkoengatik ari zen] mendekua nahi duzuelako, gorroto nauzuelako”.
Orduantxe hasi da Esparza besoak altxatzen, keinuen bidez adierazten onartezina eta etsigarria dela Cerdan esaten ari dena… eta puntuari eutsi dio milagroarrak. “Zeu, Esparza jauna, ni bezalaxe, hilotz politiko bat zara”, bota dio. Eta jendeak marru. “Esparza jauna, zeuri min gehiena egiten dizuna ez da ikerketa batzorde hau sortzera eraman zaituena, baizik eta nire parte hartze politikoak egiten dizu min, Nafarroako Gobernutik atera zintuztedalako, eta nigatik ez zara presidente”. Eta jendeak, berriz, marru. UPNkoek ia txistu ere bai.
Esparzaren haserrea eragin du horrek, badaki-eta egia dela. Cerdan izan zen PSN barruan mugimendua eragin zuena; ordura arte beti bizkarra eman arren, PSN ezker abertzalearekin eserarazi zuena; eta negoziatu zuena UPN kanpoan utzi ahal izateko. Nafarroako eskuinak ez du hori sekula onartu. Egia da, horri esker, azken bi agintaldietan PSNk agindu duela, EH Bilduren kanpo-babesarekin, eta Iruñeko Udalean alderantziz.
Sumindura horretan, Esparzari mihia joan zaio: “Nafarroako bi gobernu eta Iruñeko udal gobernua lapurtu dituzu zuk, Cerdan jauna, lizunkerietan arituta!”. Eta Cerdanen erantzuna, titulura eramateko modukoa: “Hitz egin dezakegu negarrez deitu zenidan egun hartaz?”.
- UPN, errelebo bila. Esparzak ez du karguan jarraituko, hiru hautagaitza aurkeztu dira, baina litekeena da Iruñeko alkate ohi Cristina Ibarrola izatea UPNren buruzagi berria. Bihar jakingo da.
