Egun on.

Asteazkena da. 

Goazen mamira. Eta flipatu pixka bat argazkiarekin.

Fusilaren hotsa

Argazkiagatik soilik, buletineko lehen albistea izan behar zuen. 

Lander Arbelaitzek bidali digu Rojavatik. Kontatuko dizut testuingurua.

Badakizu, Lander gure lankidea Rojavan da, Siriaren menpeko Kurdistanen. Giroa oso-oso bero dago, Siriako Gobernuak menderatu egin nahi baititu kurduak, eta boterea kendu. Su-etena adostua dute, baina inor ez da fio. Euskal Herriko laukotea eragile sozial eta politikoekin ari da elkartzen, egoera gertutik ezagutzeko eta, ahal den heinean, informazioa munduari helarazteko.

Kurduen barne-antolaketa mailak ospea du, beti izan da txalotzekoa. Botere gune guztiak horizontalak izaten ahalegintzen dira, derrigorrezkoa da emakumezkoak egotea, eta kulturalki, gizarte eta komunitate zabalak eratzea dute helburu. Ezagutzak ere partekatzen dituzte. Goiko argazkia horren adibide. Boluntarioz osatutako segurtasun sareak dauzkate, eta horietako batean egon da Lander. Benetan kronika ederra bidali digu.

A. Imajinatuko duzu. Halako kazetaritza-bidaiak posible dira milaka lagun Argia Jende direlako, edo zaretelako. Eskerrik asko. Harpidedun ez bazara, hortxe duzu aukera. 
EGIN ARGIAKOA

Estrategikoa izan behar lukeen legea

EAEko Kultur Sistemaren Legea egosten hasi dira, ekarriko dut hona aurrerago, abendurako espero baita lehen planteamendu bat erredaktatuta egotea, eta orduan helduko da Eusko Legebiltzarrera, gauzak fintzen joateko. Baina hasiak dira gonbidatuak Legebiltzarrera deitzen, haien iritzia ematera, legeak zer babestu behar lukeen adieraz dezaten. Aldatu Gidoia Euskararen Alde ekimenekoak egon ziren atzo.

Aldatu Gidoiaren iritziz, ezinbestean, herri ikuspegiarekin egin behar da legea, sortzaileak zainduko dituena eta euskaraz pentsatua. Euskararekiko “diskriminazio positiboa” eskatu dute, baita euskarazko kultura merkatu-logikatik kanpo uztea ere, eta hori dena legez jasotzea. Kuotak ere eskatu dituzte. Eta kuotez hitz eginda, EITBri kargu hartu behar zaiola iradoki dute. Pentsatzen dut, zer gutxiago Kultura Sailaren diru-partiden erdia hartzen duen erakundeari kuotak ipintzea baino. 

Baina belarri batetik sartu eta bestetik ateratzen zaizkie gobernu bazkideei. Zer esanik ez PSEkoari, hitz erdi ere euskaraz egiten ez dituen legebiltzarkideari. Legea “oso garrantzitsua” izango dela esan bai, baina euskarazko kultura ez dagoela txarto ere esan du, eta gogorarazi, ahantzi bazaigu, EAEn bi hizkuntza koofizial daudela. EAJkoak, berriz, hitz polit eta potoloak egin ditu kulturaren alde, deus esateko. Hori bai, muturtu samar zegoen, Aldatu Gidoiakoek leporatu dietelako kultur politiketan ez dutela euskara erdigunean ipintzen. 

EH Bilduko Josu Aztiriak oroitu duen gisan, gauzak ez dira ondo hasi lege honen erredakzioan. ARGIAn kontatu genizuen moduan, Jaurlaritzak azpikontratatuta, Espainiako PPren bueltako abokatu bulego bat ari da legearen aurreproiektua erredaktatzen. Dena ondo, beraz, euskal oasian.

·····>   Ez galdu hauek
  • Errugabe. Gogoan izango duzu duela bi urteko Korrika baliatu zutela 36 migratzailek, lekukoa Irundik Hendaiara zihoala, Bidasoa ibaia gurutzatzeko. Bada, zazpi kide auzipetu zituzten, eta epaiketa egin ondoren, atzo ezagutarazi zen errugabe jo dituela Baionako Auzitegiak.
     
  • ‘Itzulera’-k saria. Donostiako Antzerki saria jaso du Errenteriako Dejabu antzerki konpainiaren obrak, Itzulera-k. Martxoaren 27an izango da ekitaldia, eta antzezlana ere eskainiko dute. Benetan ederra dela esan dezaket.
     
  • Berlinale. Alemanian, harritzekoa, berriz ere apal agertu dira Israelgo estatu genozidarekin. Berlinale zine jaialdia egiten ari dira, eta epaimahai buruari, Wim Wenders zinegile alemaniarrari, galdetu diote ea Gazako genozidioa gaitzesten duen, baina behin eta berriz egin dio ihes galderari. Eta falta zen komodina erabili du: “Politika albo batera utzi behar dugu zineaz hitz egiteko”. Orain, nazioarteko zinegile ugari estu hartzen ari dira festibalaren antolakuntza, baina alferrik; Wendersen hitzak berretsi ditu Berlinalek.

AGENDA KULTURALA
 

Beti daude makina bat plan egiteko, baina askotan ezin aukeratu. Epe motzean datorren guztiaren ganorazko entresaka bat egiten ahalegintzen naiz asteazkenero, gaindosirik gabe.
  • Musika. Etzi, ostegunez, Gasteizko Ttipia tabernako giro atseginean, Jon Basaguren ariko da bakarka. Etzidamu, berriz, Donostiako Dabadaba aretoan Burutik eta Eskafandra taldeak, eta haize-tresna zalea denak, Iruñeko Totemen izango ditu Herenegun eta Trintxera. Larunbatean, berriz, 40 Minutu Rock jaialdia egingo da Durangoko Landakon, eta egitarau benetan zabala dute muntatua. Edo bestela, larunbatez, Lizarrako La Bota elkartean, Ezpalak, The Capaces eta Delira taldeek kontzertua eskainiko dute. Aldiz, egun horretarako plan lasai baten bila dabilena, laketgarri izan ahal zaio Grigory Sokolov piano jolearen emanaldia, Iruñeko Baluarten.
     
  • Antzerkia. Gaur, Eibarren, Tartearen teatroak Kandida antzezlana taularatuko du. Bihar, Galdakaon, Metrokoadrokak Bi baso bat ur. Eta etzi, ostiralez, Zornotzan, Axut eta Artedramak Nor naizen baneki eszenaratuko dute. Larunbatean, berriz, Korrika Kulturalaren sormen beka jaso duen Kaka antzezlana emango dute Auritzen, eta igandean Senperen. Neuk estreinaldian ikusteko aukera izan nuen, eta gustatu zitzaidan. Horiez aparte, igandean libertimendua dute Luhuson, eta maskarada Altzürükün. Eta bezperan, larunbatez, mutxikoak Arrangoitzen. 
     
  • Literatura. Eta hitzari loturikoetan, makina kontu negu parte honetan. Bihar, Donostian, haur eta gazte literaturan murgildu nahi duten helduei zuzenduriko saioa, Yolanda Arrietak eskainia, Gerrak eta umeak izenburupean. Bihar baita ere, Donapaleuko Otsail Ostegunetan, Casamajou-Elkegarai ahizpak ariko dira Lurdes Iriondoz sortu duten pastoralaz hizketan. Eta ostegunez ere bai, baina Usurbilen, Aitor Marcosek hitzaldia emango du desazkundeaz. Etzi, Baionako Biltxokon, Txilarreko sukaldaria liburua jendaurrean aurkeztuko du Pello Rubio protagonistak. Eta larunbatean, aldiz, Donostian, Bagera euskara elkarteak antolatuta, Haritz Azurmendi, Eider Saragueta eta Garikoitz Goikoetxearen eskutik, Euskara biharretik biharrera izenburupeko hitzaldia eskainiko dute. Bukatzeko, eta ezin ahantzi, Bilbon datorren astean hasiko den Gutun Zuria jaialdia; egitarau oparoa dute hila bukatu arte.
     
  • Bertsolaritza. Ostiralean, Donibane Garazira helduko da Gaztetxeak Bertsotan ekimena, eta egun berean jokatuko dira, baita ere, Gipuzkoako Herri Arteko Txapelketako saio ugari. Larunbatean, Izarran jokatuko da Arabako Bertsolari Txapelketaren hirugarren finalaurrekoa. Eta larunbatean baita ere, bestelako bertso emanaldi bat: Itzal(iko) bagina eskainiko dute Janire Arrizabalagak, Izaro Bilbaok eta Araitz Katarainek, Deban.
     
  • Zinema. Ostiralean hasi eta datorren asteazkenera bitartean, Ikuspuntu jaialdia egingo da Iruñean, nazioarteko 18 herrialdetako ekoizpenekin. Eta zinemetara helduko da O agente secreto pelikula, harrera beroa jasotzen ari den ekoizpen brasildarra, Oscar sarietarako ere hautagai dena. 
     
  • Bestelakoetan, hiru kontu aipatzeko: ostiralean, musika eta literatura nahasiko dituzte Jabier Muguruzak eta Bernardo Atxagak Orion; igandean, sekulako afixa zabal eta ederrarekin, Aroztegiko auzipetuen aldeko elkartasun jaialdia egingo dute Zarauzko Hiruputzu gaztetxean; eta datorren asteartean, Maule-Lextarren, hip-hop ikastaro bat antolatu dute.

Honaino gaurkoa.

Segi fuerte. Besarkada bat.

JARRAITU SAREETAN