Egun on.

Asteartea da. Urrun geratzen zaizkit ikastetxeak, baina ez da giro izango eguerdi partean.

Goazen mamira.

Bazkari gabeko umeak

Ikastetxe publikoetan, ea zer egin behar duten umeek (eta guraso, senide edo tutoreek) eguerdietan: ez zaie bazkaltzen emango jangeletan. Greba dute deituta gaur, bihar eta etzi. Egia da, 5.000 langile dira, baina irakasleen grebak baino eragin handiagoa izan dezake, ez baitago zerbitzu minimorik, soil-soilik familia zaurgarriek eta adinaren araberako salbuespen batzuek baino ez dutelako bazkaria izango.

Sektore oso feminizatua da, hitzarmen kolektiboaren blokeoa salatzen dute sindikatuek, iragarritako soldata igoerak ez dituztela aplikatzen... Eta batez ere, Jaurlaritzak ez duela esku hartzen. Zeren, leku asko eta askotan, zerbitzua azpikontratatuta dago, eta, eskuak garbitzeko, Hezkuntza Sailak dio haien arteko kontua dela.

  • Txanponaren aurkia, berriz, atzo sinatu zen sukaldaritza kolektiboko estreinako hitzarmena. Hortik kanpo daude ikastetxe publikoetako sukaldeak, baina bai eragiten die itunpeko ikastetxeetakoei eta zahar etxeetakoei, besteak beste. Soldata igoera handiak lortu dituzte (%35erainokoak zenbaitetan), eta lanaldia murriztea lortu dute, urtean 1.592 ordura. Bestelako osagarriak ere eskuratu dituzte.

Espektakulu bat, faxismoa zuritzeko

Dozenatik gora furgoneta, txakurrak, droneak, kalez jantzitako poliziak... Sekulako erakustaldia egin du Ertzaintzak EHUren Gasteizko Campusean. Estoldak ere miatu dituzte, eta inguruko edukiontzi eta ibilgailuak kendu. Baita oinezkoen joan-etorria galarazi ere. Eta jende mordo bat identifikatu omen dute goizean goizetik, inguruan zebilena edo ibil zitekeena. 

Atzo, ultraeskuineko Vox alderdiaren ekitaldia 12:30erako zegoen iragarrita, eta ordu erdi lehenago heldu dira gazte antifaxistak campusera. Ertzaintzak metro batzuk urruntzeko agindu die, faxistei lekua uzteko. Hala heldu dira Voxekoak, agente mordo batek babestuta, Espainiako banderak eskuetan. Selfie-ak egin dituzte harro-harro, manifestariei ere argazkiak egin dizkiete, eta fakultatearen sarreran eskegita zeuden pankartak eta afixak kendu dituzte. Tartean, Gasteizko Martxoaren 3ko gertakarien oroimenezko bat. Hori guztia, Ertzaintzak babestuta. 

  • Itxita zegoen Gasteizko Campusa, EHUk hala erabakita, guztien segurtasuna bermatu asmoz. Polemika eragin du erabakiak, ez ote duen neurri horrek Vox alderdiaren presentzia legitimatzen. Tira, Joxerramon Bengeotxea errektoreak esan du ezetz, “hesia” jartzea bezalakoxea izan dela, bai politikoki eta bai segurtasun aldetik.
     
  • Sindikatuek deituta, bestalde, Gasteiz erdigunean egin dute kontzentrazioa, Euskal Herria “antiarrazista, feminista eta euskalduna” dela aldarrikatzeko.

Hemen auzia da, adierazpen askatasunaren aitzakiapean, kolektibo batzuekiko gorrotoa hauspotzen duen alderdi bat lasai-lasai etor daitekeela Gasteizera, EHUra, hemengo Poliziaren babespean. 

·····>   Ez galdu hauek
  • Migratzaile bat jipoitu, eta karguz igo. Duela bi urte, bideoz grabatuta dago, Donostiako udaltzain batek dozena erdi kolpe baino gehiago eman zizkion lurrean zegoen migratzaile bati, aldamenean beste bi agente zituela ezertxo ere egin gabe. Bada, LAB sindikatuak kontatu duenez, agente hura ofizial-orde kargura igo dute. 
     
  • Lan heriotza Lantaronen. Piroteknia enpresa batean izan da leherketa, langile bat hil da, eta beste bat larri zauritu. Aurten Euskal Herrian hildako zazpigarren langilea da. Eta buletina idazten ari naizen unean, ez dago argi ea atzo arratsaldean Kuartangon gertatutakoa lan istripua ote den; trenak furgoneta bat harrapatu du, eta gidaria hil da.
     
  • Seaskaren ARTA. Hiru urteko ikasketa programa aurkeztu dute, etxez etxeko arreta zerbitzuan, haurtzaindegian, adinekoen egoitzan eta oro har Gizarte Zerbitzuen alorrean trebatzeko, euskaraz.
     
  • Gutun Zuria. Hitzaren askotariko diziplinak biltzen dituen jaialdia da, Bilbon egiten dena. Gaur hasiko da, eta larunbatera arte iraungo du. Badira makina bat ekitaldi; hemen duzu egitaraua, begiratu bat eman nahiko bazenio.

PANTAILARA ITSASTEKO BAZKA
 
  • One Battle After Another. Akzio askokoa eta bizia da, abentura bat. Ederra iruditu zait pelikularen kontatzeko modua. Mugimendu armatu antiarrazista baten bueltan ardazten da, hasieran 1970eko hamarkadan, eta batez ere gero, hamarkada batzuk geroago; iheslari bizimodura ondo asko ohituta daudela dirudienean, inola ere espero gabe, polizia zahar bat haien bila hasiko baita. Sari ugari jaso ditu iragan asteburuan, Bafta sarietan, eta litekeena da ere Oscarretan goi-goian aritzea. HBOn eta Movistarren, baina ez dago euskaraz.
     
  • Hamnet. Zineman egon naiz, William Shakespearen emazte izan zen Agnes protagonista duen filma ikusten. Haur bat hil zitzaien 8 urte-edo zituela; senar argitsua, nola ez, zaintza lanez ez zen batere arduratzen; eta horregatik, Agnesen doluan zentratzen da pelikula. Edo horrela saldu dute behintzat. Baina niri oso kontakizun ahula iruditu zait. Doluari ez zitzaion izenik ipintzen garai hartan, baina tira, dezente gehiago konta zitekeela uste dut. Zer diozu zuk? Erantzun mezuari nahi baduzu, eta eztabaidatuko dugu.
     
  • Strappare lungo i bordi. Edo “Puntuen marratik moztu”, Zerocalcare komikigile italiarrarena. Ez naiz animazio zalea, baina zeinen ondo erretratatzen duen gizartea Zerocalcarek, zeinen argitsu, umoretsu, sarkasmo puntuarekin... Ederra. Kapitulu laburrak dira, eta irentsi egiten dira. Oso ona da, baita ere, telesail honen segida: Questo mondo non mi renderà cattivo edo “Mundu honek ez nau pertsona txarra egingo”. Are politikoagoa da, aurrekoaren segidan ikustekoa. Netflixen daude biak.

Portzierto, ikusi al duzu Gasteizko Martxoak 3 elkarteak argitaratu duen kantua eta bideoklipa? Giroa goxatzeko, biolin eta biolontxelo ederrekin, Idoia Asurmendik abestuta; laster helduko da 50. urteurren eguna.

Honaino gaurkoa.

Astearte ona izan. Besarkada bat.

Ez zaude email buletinera harpidetuta? Eman izena.

JARRAITU SAREETAN