|
|
|
|
Datozen egunetarako plan bila? Entresaka bat egiten ahalegintzen naiz asteazkenero, gaindosiak saihesteko. Irudian, Sara Zozaya musikaria.
|
|
|
- Musika. Bihar, osteguna, Bidenabar taldeaz goxatzeko aukera izango da Andoainen. Ostiralean, Naxker eta Nhil talde zinez interesgarriak igoko dira Bergarako Kartzela Zaharreko oholtza gainera. Eta egun berean, Biznaga eta Ezezez taldeak ariko dira Bilboko Santana aretoan; eta Gasteizko Jimmy Jazzen, Kaos Urbano eta Istilu. Larunbatean, Olatz Salvador Erandion, eta Maule-Lextarren, Dizkobolo. Besta giroa, aldiz, Zestoako gaztetxean: Rodeo, Sofa eta Pelax taldeak, besteak beste. Kontzertu lasaiagorik nahi duenak, ostiralean Sara Zozaya ikus dezake Gasteizko IAK-n, edo bestela igandean, Hondarribiko Psilocybenean, Zozaya bera eta Xak. Musika klasikoa gogoko duenak, berriz, bi hitzordu interesgarri ditu Iruñeko Baluarten: bihar, Nafarroako Orkestra Sinfonikoaren kontzertua, eta ostiralean Euskadikoa.
- Antzerkia. Bihar hasi eta igandera bitartean, Trajea taularatuko dute Donostian. Bihar, Korrikaren aitzakian bira luzean ari den Kaka antzezlana helduko da Santurtzira, edo etzi, bestela, Elizondon ikusteko parada ere bada. Ostiralean baita ere, Ozaetako Garaion sorgingunean, Metrokoadroka taldeak Bi baso bat ur antzezlana taularatuko du. Ortzaizen, berriz, Imanol Epeldek ikuskizun berria eskainiko du: Zerbait sartu zait begian. Eta Hendaian, ostiralez ere bai, Bitsa konpainiak Ni errekadista nintzen antzezlana eskainiko du. Larunbatean, Renata Azkoitian, eta igandean, Usurbilen, itxura benetan ederra duen Kolapsoa, edota Desobedienteak 18/98 Galdakaon. Trufa garai honi lotuta, bestalde, libertimendua egingo dute estreinakoz Markiña-Xemeinen, larunbat goizean; igandean, berriz, libertimendua izanen da Baigorrin, maskaradak Altzain eta Lakarrin, eta mutxikoak Donibane-Lohizunen.
- Bertsolaritza. Iruñean, bihar, Ane Labakaren poesian oinarritutako bertso saioa dute, eta antzera Bidania-Goiatzen, etzi, Uxue Alberdiren lana oinarri ariko dira bertsotan. Atharratzen, ostiralean, Haizea dator ekimen berezia. Eta larunbatez, Gipuzkoako Herriartekoa makina bat lekutan jokatuko da, Getarian, Azkoitian, Eibarren eta Usurbilen, besteak beste.
- Literatura. Bihar, osteguna, Amasa-Villabonan, Hamaika irakurtzeko jaioak literatur-bildumaren aurkezpena. Asteasun, aldi berean, UEMAk eskainitako hitzaldi interesgarria: Nola eragin gure seme-alaben hizkuntza ohituretan?. Etzi, ostirala, Baigorrin aurkeztuko du Haize beltza liburua Amaiur Epherrek. Larunbatez, Atharratzen, Zazpikiak Bat komiki kolektiboa aurkeztuko dute. Eta igandean, Atxondon, bertso-saio literarioa dute, Hamaika irakurtzeko jaioak literatur-bildumari segi, Miren Artetxeren ipuinaren bueltan. Astelehenean, berriz, Eztizen Artolak Gurpilak liburua aurkeztuko du Donostian.
|
|
