2026ko apirilaren 20a.

Egun on.

Zer moduz asteburua? Futbolari loturiko kontu politikoak kontatzera natorkizu gaur.

Goazen mamira.

Ikurrinak eta txistualdiak

Ikusi duzu argazkia? Telebistako kameren bidez ikusi nuenez geroztik, ezin izan nuen burutik kendu: zer egiten zuten elkarren aldamenean EAEko lehendakari Imanol Pradalesek eta PPko buruzagi Alberto Núñez Feijóok? Eta batez ere: zeri buruz hitz egingo zuten? 

Asuntuak badu zerogarren parte gisako bat, parentesi artean-edo komenta beharko genukeena: erakundeetako ordezkarien palkoan, Núñez Feijóo zen bertan egotea tokatzen ez zitzaiona; auskalo nork gonbidatu zuen, eta zergatik ipini zuten Pradalesen aldamenean... Hilabete falta da Andaluzian (Sevillan jokatu zen finala) hauteskunde autonomikoak egiteko, eta ziur horri lotuta zihoala bere parte hartzea.

Baina tira. Noan interesanteenera. 

Espainiako Erresumako ereserkia bozgorailuetatik hiper-altu ipini bazen ere, oso-oso nabarmena izan zen estadio erdiak gogotik egin zuela txistu, eta enbarazu egin ziola beste erdiaren zati inportanteari. Realzaleek ikurrina mordo bat eta beste makina bat banderatxo astindu zituzten, Aitor Zabaletaren irudidun pankarta izugarri handi bat zabaldu zuten, eta hori ez zitzaion batere gustatu Espainiako eskuinari. Begira, Cope irrati-kateko aurkezleak konparatu egin zituen Espainiako ereserkiari txistu jotzea eta “musulman ez den orok egin dezala salto” oihukatzea, bata eta bestea gorrotoan oinarritzen direlako. Bide antzekotik baina apur bat lasaiago jo zuen PP alderdiak, erne, Núñez Feijóo eta Pradales aldamenean eserita zeudenean. “Batzuek kirola erabiltzen dute haien etsipenak azaleratzeko eta politika egiteko”.

Larunbateko futbol partidua baino egun batzuk lehenago, EH Bilduko Arnaldo Otegik dei egin zuen ikurrinak eta bestelako banderak Sevillara eramateko, estadioan bertan ahalik eta gehien erakusteko. Otegiren adierazpen horiekin oso kritiko agertu dira PPkoak, baina ez soilik sektore horretakoak. Baina soilik Otegi kritikatu dute. Kuriosoa da, zeren Eusko Jaurlaritzak milaka ikurrina oparitu zituen Errealeko zaletuen gunean, Sevillan, larunbat osoan zehar. Eta PPk ez du ezer esan. Núñez Feijóok ez du deus erran. Hitz egingo al zuen horretaz Pradalesekin? Ia hiru ordu iraun zituen ekitaldi osoan, zer izango zuten hizketagai? 

Espainiako prentsak propio egin dio kasu txistualdiaren afera lerden horri, zerbait behar duelako, nahita utzi ahal izateko baztertuta Aitor Zabaletak izandako presentzia handia, bai partidu aurretik, bai bertan eta bai ondoren. Madrilgo Atléticoko ultraeskuineko talde antolatu batek hil zuen 28 urteko Zabaleta, 1998ko abenduan, Madrilen. Errealeko zaletuek ondo gogoan eraman dute urteotan haren izena, eta memoria lan horren emaitza izan da, publikoki bederen, Errealeko zuzendaritzaren begiko ere izatea Zabaletaren alde egiten den lan eskerga (adibidez, dokumental hau).

Dena estu Ormuzen

Itsasarteak 24 ordu ere ez ditu egin irekita asteburuan. AEBen eta Mendebaldearen eskaera bete du Iranek, zabaldu du Ormuzko pasabidea, baina AEBek tranpa egin dute; ez dute armada erretiratu, eta atzeko blokeoa egiten segitu dute. Horregatik, alde batetik bestera pasatzen ahalegindu diren lehen hamar ontziek arrakastaz lortu dute, AEBen interesekoak zirelako, baina ondorengo bi ontziak gelditu egin dituzte, Iranen aldekoak zirelako. Gauzak horrela, Iranek, oso haserre, itxi egin du berriz pasabidea. 

Blokeorik gabeko egoeran, gerra hasi aurretik, egunean gutxi gorabehera 150 ontzik zeharkatzen zuten Ormuzko itsasartea. Handik igarotzen zen mundu mailan kontsumitzen zen petrolioaren %20 inguru, eta blokeoaren ziurgabetasunak eraginda ari dira prezioak hainbeste igotzen mundu mailan. 

Astelehen honetan Pakistanen berrartuko omen dituzte balizko bake baterako negoziazioak Iranek eta AEBek, Trumpek bultzatuta. Baina Iranek esan du ez duela ordezkaritzarik bidaliko AEBek Ormuzko atzeko blokeoarekin segitzen badute. Trump mehatxuka ari da, bien bitartean: “Ez baduzue nire proposamena onartzen, zentral energetiko guztiak suntsituko dizkizuet”. Asteartea ipini du “azken aukera” gisa. 

ARGIAn jendartea eraldatzeko tresna izan nahi dugu kazetaritza kritikoaren bidez.
EGIN ARGIAKOA

·····>   Ez galdu hauek
  • Trebiñu. Herri galdeketa egiteko bermeak eskatuko dizkio EAJk Espainiako Gobernuari, arabar izateko duten nahia bete dadin. Trebiñu Egunean egin dute aldarrikapena herritarrek, eta EAJko buru Aitor Esteban egitasmoaren alde azaldu da.
     
  • Osakidetza. Osasun Publikoaren Aldeko (OPA) herri plataformak mobilizazioak egin ditu Bilbon eta Gasteizen. Inbertsioak eskatu dituzte Osakidetzarentzat, eta kexa azaldu dute Osasun Mahaia osatu eta zortzi hilabetera gauzak okertu egin direlako. Alberto Martinez sailburuaren dimisioa ere galdegin dute. 
     
  • Galdakaoko gaztetxea. Fabrika zaharra okupatu eta astebetera hustu du Ertzaintzak gaztetxea Galdakaon. Eraikinaren jabeak ipinitako salaketa “kautelazko desalojo-agindu” batean gertatu da. 
     
  • Señora sariketa. Talde berri bat du antolakuntzan Señora bertso sariketak. Filosofiari eta oinarriei eutsiko dieten arren, banakako formatura itzuliko da berriz. Hiru saio jokatuko dira guztira; ekainaren 6an izango da finala.     

HORRA HOR
 

Eguzkirako krema. Realaren aurka jokatu du asteburuan Marcos Llorente futbol jokalariak, eta akordatu naiz, eskuinarekin eta eskuin muturrarekin ez ezik, negazionismoarekin ere lotuta dagoela. Lurra laua dela ere badio tipo honek. Ez dakit zer moduzkoa izango den, baina Gasteiz aldean ezagutuko dute, Alaves taldean ere jokatu baitzuen.

Sare sozialetan leloarena egiten du Llorentek, eta jarraitzaile mordoa ditu. Baina desinformazioa ere zabaltzen du lepo. Krema pote batez mozorrotuta agertu zen, mezu honekin: “Zure biologiaren aurkako babes osoa naiz”. Llorentek dio azalean melanoma sortzen duela kremak, eta ez eguzkitan gehiegi egoteak. Gizakiak “prest” egon behar du eguzkia hartzeko, eta horretarako goiz eta arratsalde egon behar da eguzkitan, ez soilik “hiru egunez abuztuan eta eguerdiko orduetan”. Gorputza “tontotuta” daukagu, “gaixotuta”, eguzkirako kremak D bitamina hartzea galarazten digulako.

Ez nator kremari publizitatea egitera, baizik eta asteburuan futbol partidu hori ikusi baduzu eta tipoa ezagutu baduzu, horrelako leloak leku denetan aurki daitezkeela esatera. Eta kezkagarriena iruditzen zaidana zera da, halako gezurrak esaten dituela bi milioi eta erdi jarraitzaile dituen sareen bidez; ez al da hori gizartea tontotzea? 

Honaino gaurkoa.

Astelehen ona izan. Besarkada bat.

Ez zaude harpidetuta? Eman izena.

JARRAITU SAREETAN