Tristura Urruñan, adibidez; eta zoriona Senperen, esaterako. Sorpresarik izan bada abertzaleentzat, agian, bi herri horietan izan dira. Izan ere, Urruñan, Philippe Aramendik auzapez izaten segitzea espero zen, eta oraindik ere gerta daiteke, bigarren itzulia egiteke dagoelako, baina ez dirudi oso probablea; eta Senperen, berriz, emaitza irauli eta definiturik gelditu da abertzaleek babestutako Christophe Jauregi izanen dela auzapez berria.
Boto kopurutan gora egin dute abertzaleek, eta ez da gutxi panorama dagoen eran.
EH Baik sostengatutako beste hautagai batzuk ere izango dira auzapez. Besteak beste, Ziburun, karguan segituko du Eneko Aldanak, eskuinaren zerrenda aise menperatu baitute abertzaleek; Donapaleun ere aurreikus zitekeena gertatu da, eta EH Baiko kideak tartean dituen zerrenda garaile suertatu da, eta hortaz, Pettan Aiçaguer izango da auzapez; eta, sorpresa moduan, Lekuinen, hiru hamarkadaz alkate izan den Michel Etcheverryk ez du alkatetzan segituko, eta Xabi Duhalde abertzaleak hartuko du lekukoa. Pena, aldiz, ostegunean Korrika abiatuko den Atharratzen, Maite Pitrauk ez baitu auzapez izaten segituko.
Datorren iganderako lau puntu bero:
- Baiona. Etchegaray eskuindarrak lortu ditu bozen %42, eta atzetik, botoen %22arekin, Iriart abertzalea izan da. Ezkerreko zerrendek lekua utziko baliote Iriarti, aliantzak egiteko kapazitatea balego, posible litzateke Lapurdiko hiriburuan ezkerrak eskuinari lekua hartzea.
- Miarritze. Oso alde estua dago zentroko Serge Blancoren eta eskuineko eta egungo auzapez Maider Arostegiren artean. Hirugarren, mila botoko aldearekin, ezkerreko koalizioa gelditu da.
- Bokale. Lau zerrenda lehiatu dira, eta garaile irten da EH Baikoak barne hartzen dituen ezkerreko zerrenda. Egungo auzapezak, zentro-ezkerreko zerrendak, hirugarren egin du. Baina den-denak oso estu. Eta lau zerrendak igaro dira bigarren igandera.
- Kanbo. Marieniako lurretan etxebizitzak egitearen alde dagoen egungo auzapezak, Christian Devezek, bigarren egin du, Peio Etxeleku jeltzalearen atzetik.
11 herritan jokatuko da bigarren itzulia datorren igandean. Hauexetan: Baiona, Miarritze, Hendaia, Donibane Lohizune, Azkaine, Urruña, Kanbo, Beskoitze, Bokale eta Arbona, horiek Lapurdin; eta Zuberoan bakarra, Maule.
Gauza asko begiratu daitezke bart gaueko emaitza sortaz, zifrak xeheago begiratu eta analisi sakonagoak egiteko. Gonbita luzatzen dizut Jenofa Berhokoirigoin lankidearen artikulua irakurtzera, panorama argiago ulertzeko, eta aldaketa esanguratsuen berri izateko.
Bestalde, hemen uzten dizut mapa, udalerrika bilaketa egin dezazun; eta hemen ipintzen dizkizut ARGIAren erredakzioan bart idatzi ziren albiste guztiak.
Datorren astean ere egingo diogu jarraipen berezia bigarren itzuliari.
