Atzo kontatu nizun hastear zela Jon Perurena irakasle erasotzailearen kontrako auzia. Irungo institutuan, duela bi ikasturte, 13 eta 15 urteko hiru neska ikasleri proposamen sexualak egin zizkien, bideo lizunak bidali, biktimak manipulatu... Gauza higuingarri asko, frogatuta gelditu direnak lehen auzi saioan. Mikel Garcia lankidea bertatik bertara egon da, eta ongi laburbildu du kronikan: “Desatsegina bezain argigarria izan da Jon Perurena irakaslearen kontrako auziaren lehen eguna”.
Berez, akusatua izanik, Perurenak deklaratu behar zuen lehenbizi. Baina eskatu du auzi saio osoaren amaieran deklaratzeko, eta halaxe izango da; gaur egingo du. Hortaz, epailearen aurretik pasatzen lehenak adin txikiko ikasleak eta lekukoak izan dira. Ateak itxita egin dute, baina informazioa eskuratu dugu.
Argi geratu da oro har Instagrameko profil faltsu baten bidez jardun duela Perurenak biktimak harrapatzeko. Mezu-truke horiek ipini dituzte mahai gainean. Ikusi denez, opari edo diru truke sexu harremanak izatea eskaintzen zien irakasleak, eta komentario lizunak egin zizkien, gehienbat gorputzari buruzkoak. Ertzaintzak, urteotan, informazioa bilatu du ikasleen mugikorretan, gorde du, eta hainbat proba erakutsi ditu. Esaterako, adin txikiko baten mugikorrean topatu dute Perurena masturbatzen erakusten duen bideo bat.
Ez naiz nazkagarrikeria horietan luzatuko. Inportantea izan da defentsa entzutea. Bere akusatua bezalaxe portatu da: higuin. Besteak beste, iradoki du solasaldi horien tonua “jostaria” eta “txantxetakoa” zela. Baina bere kabuz erortzen da argudio hori. Zeren, akusatuak ohartarazi eta mehatxu egiten zien mezuak inori ez erakusteko eta borratzeko. Eta hori ere gordeta dago.
