Euskarak ez duela gizartea polarizatu behar dioena, sarri horretan ari da. Horretan ari dira PSE-EE eta Eneko Andueza. Burukadaz burukada, pixka bat jakobinoen antza hartuta gainera. Zentralista muturtuak. Bi urteroko zita da hau ere Anduezarentzat: Korrikaren aurka mintzatzekoa. Tira, edo “batzuek” (esan nahi baitu, “los de siempre”) horiek kritikatzeko momentuetako bat.
Anduezak hartu izan du lekukoa zenbaitetan, eta irribarretsu agertu izan da argazkietan. Aurten, ordea, bere lagun CCOOkoek euskaldunongandik jaso duten mespretxua (gutxienekoa izan dela) tarteko, erabaki du haserre ipintzea eta berak bai erreakzionario jokatzea. Gustatzen zaion moduan, langileriaren bandera altxatuta: “CCOOk eta guk milaka langileren eskubideak errespetatzen ditugu”. Eta ametsetan ere errepikatzen duen hori ere bota du, jakina: “Herrialde honetan batzuek euskara bereganatu egiten dute, beraien jabetza esklusibo moduan ulertzen dute; bada garaia jakiteko euskara guztiona dela”. Euskara guztiontzat eta euskara denontzat.
Euskara erabiltzen du Anduezak, eta majo erabiltzen du, eskertzekoa da, alderdi horrek izan baititu euskaraz zipitzik ere egiten ez zuten eledunak. Baina halako astakeriak esaten dituenean, sarri oroitzen naiz euskaltegiko irakasleak esan zidan honetaz, ahozko azterketa egitear nintzela: “Lasai hitz egin, eta euskara bikainean aritu, nahiz eta euskararen eta hizkuntz eskubideen aurka mintzatu”. Halako zerbait egiten du Anduezak. Beharbada eleganteago. Ez askoz ere gehiago.
Korrikarekin izandako gaira itzulita. Honek kitzikatzen nau gehien. Zeren, alderdi sozialistak bistan da badituela bere kontraesanak. Anduezak lekukoa hartzearen aurka hitz egin du, eta ez du hartuko, baina iragan asteburuan, Nafarroan, Milagron, bere alderdi politikoak hartu zuen lekukoa, eta azken orduotan ere, Gipuzkoan, PSE-EEkoek parte hartu dute Korrikan. Inork ez du ulertzen zergatik, eta Anduezak berak ere ez. Ez du jakin galderatik irteten Euskadi Irratian egin dioten elkarrizketan.
