Egun on. 

Ostirala iritsi da. Hauxe izango dut oporren aurreko azken buletina. Apirilaren 13an itzuliko naiz.

Korrika ere ari da tipi-tapa amaierara heltzen. Lekukoa Galdakaon da oraintxe, Lemoatik eta Zeanuritik pasatuko da goizean, eta Araban sartuko da bazkalordurako. Gauean, Gasteizen. Bihar, Gipuzkoa barnealdean emango ditu ordurik gehienak, eta igandean 12:00etarako helduko da Bilbora. Zuzenean eskainiko dizugu. 

Eta buletin hau astelehenean egongo ez bada ere, Korrikaren azken eguneko detaile guztiak gure webgunean jasoko ditugu fin-fin. 

Portzierto. Poza eragin zidan Leire Artolak atzo Korrikaren furgonetatik idatzitako kronikak. Bost orduz korrika aritu ziren lapurtar gazte eroak, Donostiako surflariak euskararen alde, dantzariak eta erraldoiak herri askotan... Euskara ere beharrezko zaigulako gure aisialdian. 

Goazen mamira.

(In)justizia

Injustizia. Justizia. Egin justizia.

Titular horrek balio dit albiste honetarako eta hurrengorako ere bai.

Aste honetan jakin da bigarrenez itxi dutela Amaya Zabarte Realeko zalearen kasua. Duela bi urte, Realaren eta PSGren arteko futbol partidaren atarian izandako istiluetan oso larri zauritu zuten Zabarte, Ertzaintzaren oldarraldi batean. Izan zitekeen froga faltak daudela, baina ez da horrela: bideoak daude. Duela bi urte argitaratutakoak. Eta orduko hartan ere argi ikusi genuen, Zabarte lurrean dela, ertzain batek nola hanka lehenik atzera botatzen duen, eta gero aurrera, eta jo egiten diola. Hori ez bada ostiko bat, ea zer demontre den. Epaileak dio bideo-irudiak ez direla “garbiak”.

Iker Sarriegi abokatuak darama Zabarteren salaketa, eta berarekin hitz egin du Urko Apaolaza lankideak. Harrituta ez ezik, haserre ere agertu da epailearen erabakiarekin. Ezer baino lehen, orrialde eta erdiko idatzi batean artxibatu dituelako bi eztabaidagaiak: batetik, ea Ertzaintzaren jaurtigai batek buruan jo ote zion, eta gero, lurrean zela, ea ostikoa jo zioten. Sarriegi abokatuak dio gutxienez hamar zantzu identifikatuta dituztela, epaileari aurkeztu dizkiotela, baina ez duela batere interesik azaldu. Sinesgarritasun osoa eman diola ertzainaren bertsioari. Zeren, absurdoa dirudi, Ertzaintzaren protokoloak dio agenteek ezin dutela korrika egiten ari diren bitartean jaurtigairik bota, eta hortaz, epaileak esaten du halakorik ezin zela gertatu. Protokoloak ezin puska daitezke, antza. Inoiz.

· · · · · · ·

Guraso hautsien kemena

Auzi hau ere ez da samurra.

Urtebete baino gehiago igaro da Kerman Villate hil zutenetik. Agian gogoan izango duzu: parranda testuinguruan, Gasteiz erdiguneko diskoteka bateko atezainak zartako batez erail zuen 31 urteko mutila. 

Haien gurasoek zerbait erakutsi badute hilabeteotan, ausardia eta kemena izan dira. Plazara irten dira etengabe-etengabe, makina bat bider jausi eta altxatu dira, beti justizia eske. Zeren, lehen unetik argi ikusi dute delituaren larritasuna apaltzeko intentzioa dutela arduradun guztiek. 

Gau hartan etxera joan zitzaizkien bi ertzain, “zuen semea borroka batean hil da” esatera. Eta gurasoek erantzun: “Gezurra da; gure semea ez da borroketan aritzen”. Eta gezurra zen. Ez zen borrokarik izan. Lehendik ere Gasteizko Udaltzaingoan bazuten diskoteka horretako atezainen indarkeriaren berri. Diskoteka horrek ez zuen behar bezalako asegururik. Eta kontratatutako segurtasun enpresak era irregularrean jarduten zuen. Matoi batzuk zituen langile.

Kemena dute Villateren gurasoek. Bide guztiak urratzen eta kanpaina mordo bat egiten ari dira kalean eta komunikabideetan, eta ari dira mugitzen, baita ere, erakunde publikoen batzordeetan. Baina esku ilun bat bada atzetik, era zikinean ari dena ardura guztiak saihesten. Auzitegietan ere gauzak ez doaz ondo: “zuhurtziagabekeriaz egindako hilketa” izan dela baino ez dute aitortu. Hitz horietan badirudi “nahi gabeko zerbait” izan zela.

Gorputza sendo behar da Arantzazu Beitia eta Roberto Villate gurasoak entzuteko, Miel A. Elustondok egin dien elkarrizketa irakurtzeko, baina benetan merezi du. Zerbait sumatzen bada, horixe da-eta: kemena.

·····>   Ez galdu hauek

• Gerra Ormuzen dago. Agian ikusi duzu komunikabide handietan “bake” plan bat proposatu duela Donald Trumpek Iranentzat. Haien erantzuna hau izan da: “Ez deitu bake akordio zure porrotari”. Tankera hori du asuntoak, Mendebaldea ari dela galtzen honetan guztian. Ekonomian batik bat. Ormuzeko itsas pasabidea itxi egin baitu Iranek eta etxe aldameneko gasolindegi guztiak garestitu baitzaizkigu Mendebalde zuri honetan. Iranek, horrexegatik, baldintza hori ipini du: “Ormuzeko itsasartearen jabe neu izango naiz, eta ez zuek”. Aitortza hori egiten badute AEBek, eta erasoak geldiarazten badituzte yankiek, Iranek hitzeman du petrolioaren blokeoa hautsiko duela.
   
• Subflubialaren aurkako zientzialariak. Ehun ikerlarik baino gehiagok manifestu bat sinatu dute Bizkaiko agintariek Ibaizabal ibaiaren azpian eraiki nahi duten autobidearen aurka. Berotegi efektuko gasen isurpenak areagotuko lituzkeela ondorioztatu dute, eta tunelaren eraikuntzak trafikoa %33 haztea ekarriko lukeela.

Honaino gaurkoa.

Ostiral ona izan, eta ondo ibili bakantzetan, hala egokitzen bazaizkizu. 

Apirilaren 13an itzuliko naiz.

Besarkada bat.