Orain arte bagenion Ormuzko itsasartea blokatuta zeukala Iranek, baina ez zen erabat zuzena. Izan ere, erregaia oraindik iristen zen mundura, Iranek bere itsasontziei (eta lagunei) soilik uzten zielako pasatzen, eta ez gainontzekoei. Atzora arte. AEBek harroarena egin duten arte. Atzo arratsaldean yankiek haien armada ipini zuten hor, eta mehatxu egin dute, Irango petrolio ontziek asmoa baldin badute irteteko, Venezuelako ustezko droga-ontziei bezala egingo dietela eraso.
Iranen blokeo ekonomikoak Mendebaldeko potentziak kolpatu ditu, eta bistan da, Iranek bere galerak izan baditu ere, posizioari eusteko moduan plazaratzen zaiola munduari, bestela ez bailukete AEBek orain beste kolpe hau emango, asuntoa denontzat gehiago okertzeko. Pultsuari nork eutsiko da lehia, nahiz Trump bere teilatuari harrika aritu. Eta guztiok ordaindu.
Blokeoaz mintzo garela, kuriosoa egin zait fokuak non ipini ditugun orain. Izango da eguzki eta bero egunak egokitu zaizkigulako, eta batik bat Hegoalde honetan jende batek oporrak izan ditugulako, baina azken boladan hegazkin konpainiak eta bidaia-agentziak ikusi ditut itxuraz kezkatuta. Ziurgabetasun geopolitiko honek ez baitio batere laguntzen hain hauskorra den turismo sektoreari, baina kezkatuta ikusi ditut batik bat hegazkinek erabiltzen duten keroseno erregaiagatik. Izan ere, Europan kontsumitzen den keroseno guztiaren erdia Ormuzko itsasartetik igarotzen da. Eta jakina, jet pribatuen jauntxoak beharbada ez dira ohartuko, baina uda honetan hegazkin bat hartzekoa den langile klaseko familiari gogotik ari zaizkio igotzen prezioak. Zeren, nazioarteko merkatuetan bikoiztu egin da keroseno upelaren prezioa, eta irakurri dudanez, hegaldi luze bat egiteak duen kostuaren %40 inguru erregaiari dagokio. Hortaz, animo horretan zabiltzatenoi. Ez da erraza esaten, espekulatzaileak abilak direlako, baina gutxi gorabehera %50 garestitu omen dira zenbait hegaldi, batik bat bidaia luzekoak.
