2026ko maiatzaren 15a.

Egun on.

Donostiako Teila Fabrikan izan nintzen atzo, Urtzi Urkizuren Streaming aroa liburuaren “aurkezpenean”-edo. Tira, antzerki-solasalditik izan zuen gehiago, umoretik asko. Ekhiñe Atorrasagastik gidatu zuen saioa. Eta ondo goxatu gintuzten egia esan. Ekainaren 11rako ari omen dira prestatzen antzerako zerbait Pasaian, San Pedron… Egon adi, gura baduzue.

Eta serio jarrita: egon adi Errekaleorrera begira. Gasteizko auzo okupatuan oso larrituta daude. Asteazkenean erasoa jasan zuten: Errekaleorretik gertu kale egoeran bizi diren hainbat pertsona auzora heldu ziren, oldarkor, haien etxeetan sartzera. Istilu larriak izan ziren. Baina kontua ez da hor bukatzen: Poliziak bultzatu zien horretara, eta are, babestu zituzten. Jokaldi orkestratua dela diote Errekaleorrekoek, eta datozen ordu eta egunetan errepikatu daitekeela uste dute.

Horiek esanda, goazen astea borobiltzera.

(Europa Press)

Bi eta bi, ez beti lau

PSNk eta Geroa Baik akordiotxo bat erdietsi zutela kontatu nizun atzo, UPNri elkartuta aurre egitekotan zirela. Baina okertu nintzen. Zeren, okerreko hankarekin esnatu ziren jeltzaleak, eta kalabazak eman zizkieten soziatei. Egun kaotikoa izan zen atzokoa Nafarroako Parlamentuan. 

Kontua da Hezkuntza Departamentuak iragarri zuela hemeretzi ikasgela itxiko zituela datorren ikasturtean. Horietako bost eskola publikokoak, baina horretan, azkenean, atzera egin zuen Carlos Gimeno kontseilariak. Beraz, hamalau itunpeko ikasgela zeuden jomugan, eta maila politikoan zein kalean, soka ondo tenkatu da azken aste gutxian. Ia hausteraino. Eta horretan hartu du esku UPNk. Egoera nahasia baliatu du itunpeko ikastetxeak blindatzeko lege proposamen bat aurkezteko. Jakina, UPN delako, baina hein batean EH Bildu eta Geroa Bai ados leudeke oinarrian, itunpekoen artean ikastolak daudelako; eta hamalau itunpeko horietatik kaltetuenak ikastolak direlako. Horregatik, azkenean, UPNren lege proposamenari aurrerabidea eman diote bi alderdi abertzaleek, abstentziora jota.

Ez dago argi lurrikara politikoak zer nolako seismoak eragingo dituen. Baina zerbait mugitu da. Izan ere, Nafarroako Gobernuan PSNk du lidergoa, Geroa Bai eta Contigo-Zurekin taldeek badute pisua, badute parte hartzea; eta kanpotik, baina azken batean gobernua babestu egiten du EH Bilduk, bere interesekin. Laukote hori hautsi egin da hezkuntza arloko auzi latz horretan.

Parlamentuko irudia ere ikustekoa izan da. PSN eta Geroa Bai elkarri bizkar emanda egon dira denbora luzean; ez dute elkarrekin hitz egin. Maria Chivite lehendakaria, berriz, une batez, EH Bilduko Laura Aznali keinuka eta oihu bizian ikusi dugu, zera esanez: “Ez, ez; ez gara geure posiziotik mugituko”. Geroa Bairengana gerturatuko ote zen jakin nahiko zuen Aznalek, pentsatzen dut. Zeren, gero, EH Bilduren proposamena onartu du Geroa Baik, bi urteko luzamendu bat zatekeena, baina inora joan ez dena. 

Enpin. Ez dut uste haustura politiko larri bati buruz hitz egiten ari garenik. Haserrea egongo da, baina zaila litzateke UPNri ateak hain erraz irekitzea. 

Kazetaritza independentea estimatzen baduzu, animatu proiektua babestera.
EGIN ARGIAKOA

Medikuak fitxatzeko enkantea

Hau horrela entzun gabe neukan: “Joan behar den lekura joango gara mediku bila”. Halaxe esan du Eusko Jaurlaritzako Osasun sailburuak. Erkidegoen artean izugarrizko lehia dagoela, alegia. Zeren, horrekin batera esan du mediku hasiberriei urtean 60.000 euroko oinarrizko soldata eskainiko dietela haien erresidentzia fasea amaitu ondoren, alegia, ikasketa eta egokitze prozesuko lehen lau edo kasu batzuetan bost urteak egin ondoren. Antza, behin erresidentzia fasea bukatuta, mediku askok alde egiten dute eskaintza hobeak dituzten beste erkidegoetara edo herrialdeetara, eta mediku falta handia denez bai han eta bai hemen, eskaintzak hobetzea beste erremediorik ez dute ikusi. Hauxe da merkatua, lagun.

Merkatu plazan, Nafarroako Gobernuaren promozioa: 57.000 euro urtean, eta hiru urteko kontratua (kontratu motzak izatea ere ohikoa da lehen urteetan). Kantabriak igo du apustua: 69.000 euro urtean, baldin eta Lehen Arretan aritzeko bada.

·····>   Ez galdu hauek
  • Kuba. Fuel tantarik gabe dagoela adierazi dute. Gasa ere gutxi dute, eta energia berriztagarriekin ari dira bizirauten, nahiz egunean ordu gutxi batzuez soilik funtzionatzen dien. AEBen blokeoari nazioarteak aurre egin behar diola eskatu dute.
     
  • Flotilla. Irten da berriz Palestinarat, oraingoan Turkiatik. Eta ontzietako batean doan Hegoa Bengoa lagunak bidali digu artikulu bat, benetan ondo ekarrita barru-barruko kontuak: zer nolako beldurra pasa zuten Israelera zihoan MSCko ontzi puska desbideratu zutenean, portuz portu kide batzuk jaistea ohikoa dela… Gauza oso potenteak.
     
  • Ikuskizun sektorea. Ekitaldien muntaketan, produkzioan eta exekuzioan lan egiten duten Araba, Bizkaia eta Gipuzkoako langileek greba egingo dute gaur, bi urte geldirik daramatzan hitzarmena berritzea eskatzeko. Ostiral honetan hasiko da, hain justu, BatBatean jaialdi berria, Gasteizen: ordubeteko geldialdia egingo dute elkartasuna adierazteko. 
     
  • Amillubi. Udaberriko Festa eguna deitu dute biharko Amillubin, Zestoako Iraeta auzoan. Proiektu kolektiboa da Amillubi, nekazaritza eta abeltzaintza ekologikoa sustatzea helburu dituena, Biolur elkartearen laguntzaz. 

ASTEKO KOORDENADAK >>
 
  • I > Ikasketa. Jaurti pilota, eta ikasi matematika, fisika eta behar dena. Irungo institutuan esperientzia praktiko eder batzuk egiten dituzte; eta ez txikienek, e: 12 urtetik 16ra tartean ere baliatzen dituzte halako esperimentuak. Metodologiak, proiektuak eta diziplinak ondo landuta dituzte irakasleen artean; horren berri jaso du Mikel Garcia lankideak Ikusi eta Ikasi bideo-erreportajean. Eneritz Arzallus eta Manex Moreno lankideak aritu dira produkzioan eta edizioan.
     
  • H > Herrigunea. Herri ugaritan bezalaxe, Lekeition ere bi aparkaleku mota daude: egoiliarrak eta ez egoiliarrak (ordainpekoa). Egoiliarrek bietan aparkatu dezakete. Eta oraintsu arte, eskualdekoek ere bietan utz zezaketen autoa, herri txikiagoetan baino zerbitzu gehiago daudelako Lekeition. Baina uda pasatzera Lekeitiora joaten diren bi udatiarrek salaketa ipini dute, eta auzitegiak turisten alde jokatu du: normaltzat ikusi dute lekeitiar eta ez lekeitiarren arteko bereizketa, baina eskualdeko biztanleak sartzea ez. Hala, nortzuk dira kaltetuak? Nortzuk diskriminatuak? Inguruko herri txikietakoak. Jon Lejardiren artikulu interesgarria Lea Artibai eta Mutrikuko Hitza-n.
     
  • E > Eredua. Beste opor eredu bat asmatu behar dugula diosku Asier Basurtok; luze eta zabal espresatu da Turismoa. Desazkundera bidaia liburuan horri buruz eta, batez ere, egungo turismo ereduari buruz. Orain, luze eta zabal ez, baina labur eta zehatz mintzatu da Berria-n egin dioten elkarrizketan; irakurgai ederra ondu du Mikel Elkoroberezibar kazetariak. 
     
  • M > Montejurra. Aurreko larunbatean bete ziren 50 urte, Lizarra aldameneko Montejurrako erromerian, karlista eskuindarrek tiro jo zietela festan zirenei. Bi pertsona hil zituzten. Garai hartan argitaratu ziren argazkien eta artikuluen inguruan mintzatzeko gonbidatu dute Josu Chueca historialaria Euskalerria Irratira; entzun edo ikusi eta entzun egin dezakezu. Beti da interesgarria Chueca entzutea.

Honaino gaurkoa eta aste honetakoa.

Segida gozoa izan. 

Besarkada bat.

Ez zaude buletinera harpidetuta? Eman izena.

JARRAITU SAREETAN