Egun on.

Eta aupa Maurizia! Gaur dira 38 urte panderojole eta abeslari zeberioarra hil zela. 

Goazen mamira.

Canal+ eta soka-tira antifaxista

Nor egoskorrago, eskuin muturreko enpresariek ez dute gaur egun isilik geratzeko premiarik ere sentitzen. Horraino heldu gara; lehen lotsatuko ziren bat baino gehiago.

Zine jaialdien denboraldia hasi da Canneseko festibalarekin, asteburu honetan amaituko da, eta ez dakit zer ari den gertatzen Canal+ enpresaren zigilua daramaten filmen proiekzioekin, baina dakidana da The Electric Kiss pelikulak inauguratu zuela jaialdia, eta publikoak txistu egin zuela Canal+ enpresaren zigilua agertu zenean pantailan. Ea, kredituetan begia jartzen ez duzuenok, jakizue oso ohikoa dela zigilu hori pantailan ikustea; Frantzian film gehien produzitzen dituen ekoiztetxea da. 

Kontua da, Canneseko festibalaren atarian, zine munduko 600 artistak baino gehiagok sinatu zutela gutun bat, salatzeko Canal+ enpresak Frantziako Estatuan zine areto izugarri mordoa dituen UGC erosteko asmoa duela, apurka-apurka ari dela kapitala erosten, eta asmoa duela den-dena erosteko. Eta hala, pixkanaka, pelikulen fabrikazioa ez ezik, difusioa ere osorik kontrolatuko luke. Julliette Binoche aktorea dago, adibidez, sinatzaileen artean.

Canal+ enpresaren atzean Vincent Bolloré milioidun ultrakatolikoa dago. Berea da CNews telebista-katea, Frantziako Estatuan gehien ikusten dena; Lagardère taldeko akziodun nagusia da, eta beraz, kontrolpean ditu Europe1 eta RFM irrati-kateak, baita Paris Match eta Le Journal du Dimanche hedabideak ere. Grasset argitaletxea berea da, Universal Music Group-eko akziodun nagusia ere bera da... Ez da edonor Bolloré. Eta ezaguna da eskuin muturreko ideologia duelako, bere menpeko komunikabideak erabiltzen dituelako horretarako, eta besteak beste, erabili zituelako iragan hauteskundetan, ezkerra zigortu eta Le Pen eta Bardella zuritzeko. Jenofa lankideari makina bat bider entzun diot hori erredakzioan.

Gutuna idatzi dutenek inperialismo hori nahi dute gelditu, ahal duten neurrian. Baina Canal+ enpresako burua ez da isilik geratu: Bolloré jauna babestu du Maxime Saada CEOak. Eta mehatxu egin du: “Zoritxarrez, etorkizunean ezingo dugu lan egin gure aurkako mezua idatzi duten horiekin”. 

Nahi duzuna jaso, nahi duzuna ordaindu.

Flotilla: bahituak, berriz

Astelehen goizaldean abiatu du operazio berria Israelgo armada sionistak, eta nazioarteko uretan (eta beraz, nazioarteko legediaren aurka) egin ditu atxiloketak. Zodiac batean joan zaizkie sionista zikinak, oso oldarkor, eta buelta emateko edo atxilotu egingo zituztela egin diete mehatxu. Jakina, ez dute buelta eman, eta ontziak geratzen eta jendea atxilotzen hasi dira. Tartean zen José Javier Oses Carrasco Jotas euskal herritarra, eta bere bideo-mezua jaso dugu ARGIAn. 

Atzo arratsaldean urgentziazko elkarretaratzeak deitu zituzten Euskal Herrian: Urruñan, Altsasun, Izarran, Donostian, Iruñean eta Bilbon. 

Bide batez:

• Flotillan ez doa Turkiako banderarik duen ontzirik, baina Israelgo Defentsa Ministerioak esan du ontzi turkiarrak “are basatiago” erasotuko dituela, “europarrak baino gehiago”, Israel eta Turkia etsaituta daudelako. Flotillakoek gezurra eraikitzea leporatu diote Israeli, beldurra eragitea, eta datozen egunetan egin ditzaketen erasoak aurrez justifikatzea.
   
• Errepidez doan Global Sumud egitasmoaren karabanak 24 ordu baino gehiago daramatza geldirik Libian. Komunikazioak eten dizkiete, eta ez diete uzten aurrera egiten, kontrol polizial handiak daudelako kilometro gutxi aurrerago. 
   
• Eta Israelek jarraitzen du Palestina okupatzen. Duela zazpi hilabete “su-eten” bat indarrean jarri bazuten ere, orduan zeukana baino terreno gehiago okupatu du, %11 gehiago. Guztira, Gazaren %65 inguru okupatuta dauka. 

·····>   Ez galdu hauek

• Ziburuko kolegioa. Piarres Larzabal ikastetxeko irakasleek sarrera blokatu diete Frantziako Hezkuntza Ministerioko ikuskatzaileei. Batetik, datorren ikasturtean Seaskari ez dietelako irakasle postu gehiago emango, nahiz eta ikasle gehiago izan; eta bestetik, baxoko azterketak euskaraz egiteko aukerarik ez dutelako izanen. Hezkuntza Ministerioak areagotu egin ditu inspekzioak Betharramgo ikastetxeko sexu indarkeria kasuen ondotik. Gaur ere Ziburura bertaratuko dira ikuskatzaileak.
   
• “Pandemia arriskua”. Hala adierazi du Osasunaren Mundu Erakundeak, mundua ez delako orain dela hamar urte baino seguruagoa. Mintzo dira batik bat osasun publikoan egindako inbertsio eskasaz, eta zerbitzuak munduko leku guztietan okertu egin direla. Larrialdi egoera ezarri dute Kongon eta Ugandan, ebola birusa azkar ari delako hedatzen. OMEk ez du iradoki ebola mundura hedatuko denik, baizik eta esan du munduko osasun sistema “oso egoera zaurgarrian” dagoela. 
   
• Osakidetza eta euskara. 375.177 herritarrek esan dute euskaraz nahi dutela jaso arreta, hau da, biztanleriaren %20 inguruk. Baina Osakidetzak esan du ez duela “nahikoa baliabiderik” eskatutakoa bermatzeko, nahiz eta jakinarazi langileen %62k dutela egiaztatuta euskara gaitasuna. Mugimendu batzuk egiten hasi dira sistematikoki, besteak beste, euskaraz dakien osasun profesionala arreta euskaraz jaso nahi dutenei esleitzen; baina oraindik ere asko dago egiteko, aitortu duten gisan.
   
• Hilketa matxista. 44 urteko emakumea hil du senarrak Arguedasen, eta bere kabuz kuartelera joan da aitortzera. Aurtengo bosgarrena da. Berria-ren zenbaketaren arabera, 2003az geroztik 134 hilketa matxista izan dira Euskal Herrian.

. . . . . . .

Guraso askoren buruhauste, neke eta salbazio ere bai, zergatik ez: eskolako WhatsApp taldea. Foro eraginkorra batzuetan, desesperagarria bestetan, hizkuntza hautuak… Mikel Garcia lankideak gaiari heldu dio Etxerako Lanak podcast atal berrian: Zer berri?

Honaino gaurkoa.

Astearte ona izan. 

Besarkada bat.