Arre edo so. Bingen Zupiriaren ahotan jakingo genuen emaitza. Xabier Letonak ere hala esaten zigun aste honetako analisi batean: “Ikusiko da nork agintzen duen gehiago, Zupiriak berak edo Esan, Sipe, Euspel eta enparauek”.
Atzo hitz egin zuen Segurtasun sailburuak Eusko Legebiltzarrean. EH Bilduren eta Sumarren eskariz egin ere, nahiz eta etengabe ari diren azpimarratzen “borondatezko agerraldia” izan dela, ez inork eskatua edo behartua. Trukoa da oposizioak eskaera erregistratzen duela, eta berak ere, atzetik, eskaera egiten duela; umemokoarena egitea bezala da: “Ez nator zuk eskatuta, nik eskatu dut”.
Tira. Agerraldian flipatu dut gauza batzuekin. Hasteko, ingelesez ekin diola hizketaldiari Zupiria jaunak (trakets samar, egia esan). Gero zer, eta modu oso irmoan esateko Euskal Herriaren irudia eta prestigioa ez direla zikindu, eta nazioartean ez dela deus gertatu Ertzaintzaren karga horiengatik. Begira, Jaurlaritzaren web orrian ere titular hori eman diote. Horixe da, hain justu, EH Bilduk eta Sumarrek oso gogor kritikatu diotena, “serioski” zikindu dela herri honen irudia, aldi berean Palestinarekiko hainbeste elkartasun keinu (eta Israelen aurkako oihu) egin dituen herriaren prestigioa.
Ezagutzen ez genuen detaile esanguratsu bat eman du Zupiriak: AENAk (aireportuen jabea den Espainiako enpresa publikoak) deitu zuen Ertzaintzara, esanez flotillako kideei harrera egitera joan ziren lagunak “pilatzen” ari zirela Loiuko aireportuko irteeraren atean, eta “oztopoa” izan zitekeela beste bidaiarientzako. Orduan bidali omen zuen Ertzaintzak bere kuadrilla. Elkarretaratze hura ez zegoen Ertzaintzari jakinarazita, eta paternalismoaren kargu hartze horietako bat egin du Zupiriak, horrelakoak jakinarazi egin behar direlako, “aurreikusteko”, bestela “zailtasunak” egon daitezkeelako “elkarbizitza bermatzeko”. Enpin. Harrera egitera joan zirenei esan zieten hesiaren atzean kokatzeko, kontaktu fisikorik ez egiteko flotillako sei euskal herritarrekin, eta ekintzaileek ez zezatela aireportuko irteera oztopatu (bi ate ditu, baina tira). Unetxoren batean “oztopatu” zuten, bistan da, bideoetan ikusi da, baina segituan hasi ziren bultzakadak, eta segundo gutxian amaitu zuten denek lurrean, atxilotuta eta kolpatuta.
Eta hemen dator onena: nork probokatu zuen nor? Hori zen Zupiriak erantzun beharreko galdera. Hau da: non kokatzen da Zupiria, eta zer nolako pisua dute Ertzaintzaren barneko sindikatu korporatibo lobbistek. Horra erantzuna, diskurtsoaren bukaera-bukaeran esandakoa: “Batzuek probokatu besterik ez dute egiten; Ertzaintzak ez du hori egiten”. Eta hau, betiko klabeetara itzultzen hasita: “Ertzaintzaren aurka probokaziorik larrienak egin eta jarrera oldarkorrena izan zutenek, atxilo eraman zirenetatik bi, ETAko kide izandakoak dira; batek sei urte eman zituen kartzelan, eta besteak hamabi". Tatxan. ETAren komodina. Falta zena. Nahi badiozu eman iezaiozu soka gehiago, bai, El Correo-ri, eskuinari eta ultraeskuinari, eta Ertzaintzaren barneko sindikatu asindikal lotsagarriei. Gorka Bereziartuari irakurri diodan moduan, egiten dutena (eta egin izan dutena) eta gero, lasai ederrean begiratu beharko diegu gainera BMW berrietan paseatzen ikusten ditugunean, gainontzeko langileriarentzat iraingarria den lan-hitzarmenaren abantailez gozatzen, zer, eta langileria borraz kolpatzera joateko.
Egia esatea nahi baduzue, nik behintzat ez dut sinesten Zupiria jaunaren iritzia hori denik. Uste dut etxeko sofan ez duela lekurik topatzen, Arkautin eta inguruetan jasaten duen presioa ez dela inondik ere onargarria inorentzat, baina hor egotea eskatu diotela, onartu duela, eta egon egongo dela, erretiroa laster hartu bitartean. Miren Dobaran izan da urtetan Zupiriaren eskuin eskua; urtebete iraun zuen Arkautiko polizia-etxeko zuzendari karguan. Bistan da: gaitza etxe barruan du.
