Desobedientzia ekintzak ez dira inoiz samurrak izaten, estatuari edo estatu indarrei planto egiten dienak aukera asko izaten baititu galtzen irteteko, zigorra jasotzeko, oro har kalteturik paratzeko. Estimua diet kausa sozialen aldeko diren etika eta ideologia legearen gainetik jartzen dutenei. Eta estimua diet, kasu honetan, Seaskako ikasle desobedienteei. Ausardia behar da gero Parisko zentralismo jakobinoaren aurka indarrak batzeko eta kolektiboki aurre egiteko. Zer esanik ez baxoaren gisako halako une garrantzitsuetan.
Hego Euskal Herrian datorren astean egingo dituzte unibertsitatera pasatzeko etsaminak, eta Iñigo Martinez irakasle eta filosofoaren hitz hauek dauzkat buruan bueltaka: “Nire sentsazioa da ikasleak gero eta kezkatuago daudela espediente akademikoarekin”. Ari da kritikatzen gizarte gisa “indibidualki onenak” izatea eskatzen zaiela egungo gazteei, aldi berean kolektiboki “mezu katastrofistak” baino ez dituztenean entzuten. Tira, kritika ez zihoan ikasleei, baina horra joko dut: lehia betean bizi dira, ahalik eta espediente akademikorik onena lortu nahian, begiz jota duten unibertsitateko gradu horretan sartuko ote diren edo ez benetan larri kezkatuta; eta han doaz Ipar Euskal Herriko ikasle abertzaleak, Parisi hordagoa botata, matematikako azterketa euskaraz erantzungo dutela hitzemanez. Parisek apustuari eutsiko badio, zer? Makina bat problema sortuko litzaizkieke ikasle horiei.
Parisek, orain, iradoki du matematikako proban euskaraz erantzuten duten ikasleen azterketak ere besteak bezalaxe zuzenduak izango direla. Baina ez da ezer ziurra. Pasa den aste hasierako notizia da Parisek hitzeman duela 2028ko azterketak “elebitan” egiteko aukera izango dela, gutxi gorabehera gehienez ere azterketen erdia euskaraz eta beste erdia frantsesez erantzunda. Horrekin ez dira erabat kontent Seaskakoak: batetik, euskaraz erdia egitearekin soilik ez direlako konforme; eta bestetik, 2028a oraindik urrun dagoelako (batez ere, datorren urtean hauteskunde legegile eta presidentzialak egingo direlako Frantzian).
Kontua da, pasa den asteko iragarpen hori eta gero, Seaskak hainbat bilkura egin dituela Hezkuntza Ministerioarekin. Ez dute ezer hitzartuta jaso, baina Seaskak esan du Parisek begi onez-edo hartuko dituela euskaraz erantzungo diren datorren ekainaren 12ko matematikako azterketak. Ikusiko da. Baina bistan da mugitzeak, kolektiboki antolatzeak eta injustizien aurrean desobediente jokatzeak ematen dituela bere fruituak.
