Egun on.

Zer moduz?

Deialdia ikusi dudalako akordatu naiz. Gaur dira 47 urte Gladys del Estal hil zutela Tuteran, energia nuklearraren kontrako mobilizazioetan, eta gaur iluntzean, hil zuten lekuan bertan, Ebroko zubian, omenaldia egingo diote Bardenas Libres taldeak deituta. Larunbatean, berriz, Donostian izango da deialdia, Gladys Enean.  

Horiek esanda, goazen mamira.

Datuen itxura faltsuak

Dut taldeak bazioen ez dela “hitz berririk”, “gauza hori ez dela hori”... Ikusi kanpotik, aztertu barrundik. Itxura faltsuak!

Titular batek piztu dit arreta: 2008tik ez da hain datu onik izan langabeziari dagokionean Hego Euskal Herrian. Eta afiliazioari dagokionez ere, datu onak erregistratu dira maiatzean. 10.400 afiliatu irabazita, Hego Euskal Herrian 1.365.000 herritar ari dira soldatapeko beharrean, edo gutxienez kotizazioan Gizarte Segurantzan. Eboluzio positiboarekin kontentu agertu dira erakundeak. Ez da gutxiagorako, egia esan.

Baina datu gordin horiek ez dute inoiz lanpostuaren nolakotasunari buruzko detailerik ematen. Beti egiten zait deigarria. Ondo dago langabezia jaistea, jendea lanean hastea, baina kasu egin diezaiogun benetako asuntoari. Gero eta gutxiago dira bizitzaren garestitzeari eusteko moduko lanpostuak, edo ez behintzat gero eta gehiago. Hori baieztatzen dute aste honetan, afiliazio datuak-eta argitaratu baino egun gutxi lehenago, El Diario Vasco-k eman dizkigun bestelako datu hauek, Araba, Bizkaia eta Gipuzkoakoak. Enplegu bat baino gehiago ditu jendeak. Duela lau urte baino %50 gehiago dira bi soldata dituztenak; lehen 22.700 herritar ziren, eta orain guztira ia 35.000 dira. Errekorra dela diosku El Diario Vasco-k. Eta ez soilik Euskal Herrian; Espainiako Estatu osoan gertatzen da.

Datuetara gehiago jaitsita, esanguratsua iruditu zait hau: soldatapeko lan bat baino gehiago dituen erdiak nahiago luke lanpostu oso bat eduki, baina ez du beste aukerarik, enpresak egiten dion eskaintza lanaldi partzialekoa delako. Ez zaie nahikoa. Hortaz, soldata oso bat poltsikoratzeko, beste lan bat topatu beharrean daude. Nahitaez behar baitute lanaldi osoa osatu, edo ia gehiengora iritsi, etxeko ekonomiari eusteko. 

· · · · · · ·

Tubos Reunidos enpresari lotuta ere badira notiziak. Okerrena espero zen, baina konkurtsora atera denetik, argia ikusi dute kalera joateko arriskuan ziren 242 langileek. Aholkularitza enpresa bat sartu da tartean, eta esan die abuztura arteko soldatak kobratzeko moduan daudela, eta zuzendaritzak aurreikusitako Enplegu Erregulazio Espedientea ez dela ezarriko, ez dagoela premiarik. Eta langileek eskatzen zuten moduan, ez dira Amurrioko eta Trapagarango enpresak zatikatuko. 

Oraindik ez dago enpresa erosiko duen inor, ez eskaintza zehatzik, baina interesdunak badira, ziurrenik konkurtsoko aholkularitza enpresaren esanen zain egon direnak. Urko Apaolaza lankideak egin dizu gaiaren errepaso xehea. 

Jaso nahi duzuna. Ordaindu nahi duzuna.

·····>   Ez galdu hauek

• Etsaminak. Atzo hasi ziren unibertsitatera sartzeko probak Hego Euskal Herrian, eta ekainaren erdialdean hasita egingo dituzte Ipar Euskal Herrian. Protestak egin dituzte Ikamak eta IAS Ikasle Antolakunde Sozialistak. Biek ala biek salatu dute proba horiek ikasleen etorkizun akademikoa baldintzatzen dutela, indibidualismoa eta lehiakortasuna sustatuta. IASek gaineratu du “filtro sozialerako tresna” ere badirela etsamina horiek. 
   
• Kereila. Global Sumud Flotillako kide euskaldunek kereila kriminala aurkeztu dute Ertzaintzak Loiun erabilitako bortizkeriaren aurka. Lesio delitua, legez kanpoko atxiloketa, gorroto delitua… Frogatzeko moduko zantzuak daudela diote. Kereila ipini duen abokatuarekin hitz egin du Zigor Olabarria lankideak: “Epaitegian deklaratzera deitu beharko lukete Bingen Zupiria”.
   
• Espetxeen gainpopulazioa. Arazo larria ezagun da Frantziako Estatuan, eta problemaren parte da Baionako presondegia. Duela hilabete egindako zenbaketaren arabera, 88.654 preso daude Frantziako espetxeetan; hau da, edukiera %140an dago. Nazio Batuen Erakundeak jomugan dauka auzia. Besteak beste, kexatu da preso bakoitzari Frantzian eskainitako espazioa 1,6 metro koadrokoa delako, Giza Eskubideen Europako Gorteak gomendatutako hiru metro koadroko gutxienekoaren erdia. 
   
• Umeak zaintzeko laguntza. Haurrak 4 urte bete arte, hilean 200 euroko laguntza emango du Eusko Jaurlaritzak. Orain arte muga 3 urtetan zegoen. Laguntza unibertsala da; ez errentaren araberakoa. Gurasobakarrek, berriz, haurrak 7 urte bete arteko epean hilean 100 euroko laguntza eskatu dezakete, familia ugariek bezainbeste.

Honaino gaurkoa.

Asteazken ona izan. 

Besarkada bat.