Giro horretan ginen atzo erredakzioan, zu ere zeure zereginetan ariko zinen, Iruñetik notiziak heltzen hasi zitzaizkigunean. Derrepentean atxiloketak. Hasieran dozena bat zirela, gero hogei, eta gero 28. Denak ere gazteak, eta asko ikasleak. Institutu batean ere espektakulua muntatu zuen atzo Espainiako Poliziak, ikasle baten bila sartuta, auskalo nor izango bazen bezalaxe.
Kontua da, iragan urrian, Vito Quiles eskuin muturreko ekintzaile espainolista Iruñera etortzekoa zela, lehenbiziko aldiz Euskal Herrira, Espainian egin ohi duen gisan giroa astindu eta bazterrak nahasi asmoz, eta ideia faxistak zabaldu asmoz, idolo zuen Charlie Kirk zenaren estiloan. Unibertsitate Campusean eman behar zuen hitzaldia. Baina azkenean ez zen etorri. Kilometro gutxi batzuetara gelditu zen, igo zuen bideo bat bere sareetara, bere zortzi matoiak aldamenean, harrokeria handiz baina ziur barnetik kikilduta. Zeren, ez zen nolanahikoa izan antifaxistek erakutsi zuten antolatzeko gaitasuna. Faxismoaren aurka mobilizatu ziren, ez siglen izenpean, eta han zeuden guztiak elkartuta. Asko ziren.
Arratsalde-gau hartan istilu handiak izan ziren Foruzaingoarekin eta Espainiako Poliziarekin. Egunean bertan bi pertsona atxilotu zituzten, nahiz berehala aske utzi. Baina “ikerketak”, hala deitzen baitio Espainiako Poliziak, aurrera segitzen du, eta auskalo noiz arte luzatuko den. Eta auskalo zer nezesidaderekin. Azaroan beste operazio bat egin zuten, lau pertsona atxilotzeko; eta otsailean beste bi identifikaturen bila joan ziren. Atzo, 28 gazte atxilotu zituzten. Denekin gauza bera ari dira egiten: aliritzira bezala hautaturiko egun batean haien bila joan, indarrez eraman, kalabozoan sartu eta epailearen aurretik pasa, gero aske uzteko. Eta ari gara urrian gertaturiko kontu batzuei buruz hizketan; hori ez bada beldurra eragitea, esango didazue zer den. Egin dezaketela adieraztea, egingo dutela iradokitzea, mehatxatzea, eta gutxien esperotakoan egitea. Urtetan egin izan dutena egiten jarraitzea, alegia. Beste belaunaldi bati oraingoan. Baina gauzak zerbait aldatu direla iruditzen zait: ez dut agintaririk edo politikaririk entzun sarekada polizial hau kritikatzen.
Atzo 28ren bila joan ziren. Horietako hamabik espetxean pasatu dute gaua, ez dutelako astirik izan epailearen aurrean deklaratzeko. Horixe irakurri dut Gedarren. Eta ikusi ditut protesten irudiak. Izan ere, atzo goizean, atxiloketen berria hedatu ondotik, jendea mobilizatu zen Iruñean. Lehenik komisaldegiaren kanpoaldean, eta gero Alde Zaharrean. Ehunka lagunek hartu zuten parte arratseko manifestazioan, atxilotuak askatzea eskatzeko.
