Egun on.

Zeinen gustura ibili ginen larunbatean Ziburuko Liburu eta Disko Azokan. Topaleku ederra da aspaldian ikusi gabeko jendea agurtzeko, lagunak zertan dabiltzan-eta eguneratzeko, kulturgileak ezagutzeko, salerosketatik harago joanda gozatzeko... 

Antolatzaile gisa, ARGIAkook Baltsan elkarteko lagun jatorrekin batera prestatzen baitugu eguna, benetan pozgarria da konfirmatzea gero eta jende gehiago etortzen dela azokara, eta argitaletxeetako jendearen aldetik ere entzuten dugula plaza dotorea dela, hitzordu ederra zaiela, eta salmentak ondo joaten zaizkiela. Pista bezala, argitaletxe bateko kide batek esan zidan beste azoketan baino (Durangokoa salbu) nabarmen gehiago saltzen dutela Ziburun, nabarmen-nabarmen. Eta jo, pozgarria da. Pozgarria da euskara hutsezko eta Lapurdiko liburu eta disko azoka batek hain ongi funtzionatzea. Ni, benetan, hunkitu egiten nau sortzen den giroak. Giro ederra sortzen baita, baita ere, bazkaritan: beste inon ez bezala (uste dut), Baltsanen elkartean eman zitzaien bazkaltzen ehundik gora kulturgileri, azokan lanean zirenei. Hor dute atseden hartzeko aukera, elkarrekin bazkaltzekoa, solastatzekoa…

Eguna nola joan zen-eta zertzelada gehiago nahi badituzu, hemen duzu Jenofa Berhokoirigoinek idatzitako kronika. Eta hemen dituzu Ziburuko Azokako aurtengo omenduaren hitzak, Beñat Oihartzabal hizkuntzalariarenak.

A, eta ARGIAren aldetik ere benetan gustura gaude jasotako harrerarekin. Hantxe izan genituen udaberri honetako lau nobedadeak, hantxe izan ziren egileak, eta hantxe aurkeztu genuen lehenbizikoz Zuhaitzak eta arbolak Euskal Herrian liburu mardula. Oso jendetsua izan zen ekitaldia. Estitxu Eizagirrek jaso ditu detaileak.

Tira, ohi baino sarrera luzeago hau eta gero, noan hastera.

Egizu gazteleraz, hobe izango zaizu-eta

Apuntatu zara Gasteizko Udalean langile publiko izateko 54 deialdietako batera. Zu eta beste 16.233 pertsona gehiago. Euskaraz edo gaztelaniaz egiteko aukera dago, eta euskaraz egingo duzula dioen laukitxoa markatu duzu. Hala hautatu duzue 258 pertsonak. Behin aukeraketa hori eginda, ez dago atzera bueltarik.

Baina mezu bat jaso duzu postontzi elektronikoan. Gasteizko Udalaren Funtzio Publikoko Sailak sinatzen du. Esaten dizute euskaraz etsamina egitea hautatu duzuenoi zuzendua dela, eta normalki ezin dela, baina posible izango duzula azterketa gaztelaniaz egitea. Zeren “eskaera asko” jaso dituzte. Eskaera asko jaso dituzte azterketako ikasmaterial guztia ez dagoelako euskaraz, eta ez delako hain osatua, elebitan dagoenean ere gaztelaniaz informazio hobea eta osatuagoa dagoela euskarazko bertsioan baino. Beraz, euskaraz etsaminatzea hautatu duten askok kexa adierazi dute, eta eskatu dute gaztelaniaz egin ahal izateko, ez baitute nahi gaztelaniaz ikasitakoa euskaraz erantzun. Posta elektronikoan jaso duzun mezuan, Gasteizko Udalak dio “berdintasun-printzipioa babesteko asmoa” duela, eta gonbidatu egiten zaituela azterketa gaztelaniaz egitera.

Elena da lan deialdi publiko horretan izena eman duen pertsonetako bat, eta berarekin hitz egin du Intza Artetxe lankideak. Bere testigantza jaso dugu. Haserre agertu da, eta kontatu digu Gasteizko Udalarekin jarri zela harremanetan, eta udaletik esan diotela “egoerarekin sentikorrak” direla, eta ez dutela “inor behartu” ezertara. Hizkuntza Eskubideen Behatokiko zuzendari Agurne Gaubekarekin ere hitz egin dugu artikulua osatzeko; euskararen eta euskaldunen aurkako zapalkuntza sistematikoa salatu du.

Sare desegingo da

Eta datorren urteko urtarrileko manifestazioa azkena izango da.

Epe laburrean desegingo da Sare Herritarra, euskal preso politikoen sostengurako elkartea. 2012an sortu zen, gauzak gaurko egunetik begiratuta oso diferente zeudenean. Borroka armatuaren amaiera iragarri berria zen, baina gatazkaren ondorio ugari bizi-bizi ziren oraindik. Helburua argia zen: euskal preso politikoen eskubideen urraketak amaitzea, hala nola urruntze eta sakabanatze politika salatzea, eta gatazka politikoko indarkeriaren biktima guztiak aintzat hartzea. 

Atzo egin zuten prentsaurrekoa Arrasaten. “Gaur egun, zuhurtziaz baina zintzotasunez, esan dezakegu egoera aldatu egin dela”, halaxe irakurri diot Xabier Letona lankideari. Datutan: Sare sortu zenean 665 preso zeuden, eta gaur egun 120 bat daude, horietatik %70 inguru hirugarren graduan edo 100.2 artikuluarekin, hau da, kalea zapaltzen. Gaur egun 40 pertsona inguru daude gradu progresiborik gabe, baina epe laburrean aldatu egingo da. Eta trantsizio aldi bat izango dela diote. Osasuntsua eta arduratsua izango dela diote etorkizun hurbil batean Sare beharrezkoa ez izatea. 

·····>   Ez galdu hauek

• Juan Mari Aburto. Errelebo aldaketa: urtebete barru egingo diren udal hauteskundeetan, Aburto ez da aurkeztuko Bilboko alkatetzara. 2015etik da alkate. Baina ez du, itxuraz, dimisiorik emango. Hau da, ez da Donostiako jokaldia errepikatuko, ez dute alkate izendatuko (eta ez dute hain modu nabarmenean promozionatuko) hurrengo hauteskundeetan zerrendaburu izango den jeltzalea.
   
• “Justizia sena”. Horixe eskatu dio Imanol Pradales lehendakariak Ertzaintzari, erakunde horren urteroko ekitaldian, dominak eta zorion-agiriak ematen diren horretan. Lehendakariak “autokontrola” ere eskatu dio Ertzaintzari bere diskurtsoan, eta “zorroztasuna” galdegin. Baina dena ez da kritika izan. “Ez dugu Ertzaintza instrumentalizatzea onartuko” ere bota du. 
   
• Oihana Iguaran. Bera izan da garaile VI. Señora Sariketan, zapatuan Plentziako gaztetxean jokatu zen finalean. Buruz burukoan Kattalin Lizarragarekin kantatu du. Epaileei bihotza gehien ukitu dienaren “Tokado Saria”, berriz, Lide Arregik jaso du.

Honaino gaurkoa.

Astelehen ona izan. 

Besarkada bat.