Egun on.

Hementxe da osteguna. Eta hasiko natzaizu apurka-apurka despeditzen, hauxe dut-eta azken aurreko buletina. ARGIAko lan guztiei ez, baina oporrak emango dizkiot Goizean argi-ri. Bai behintzat aurreko lanari; atzeko lana dut egiteko.

Horixe esanda, goazen mamira.

· · · · · · ·

Lapurtutako lau gau

Euskal Herriko datuak ez dauzkagu, baina Paris, Lyon, Bartzelona, Madril eta Zaragoza ikusita, esan dezagun urtean lau gau oso lapurtzen dizkigula beroak. 

Txostena egin du Climate Central ikertalde estatubatuarrak: 500.000 biztanle baino gehiago dituzten munduko hiriak hartu dituzte, eta beroak lotarako orduan eragiten duen kaltea aztertu dute. Hau da, gau sargoriek gutxi gorabehera zenbat lo ordu kentzen dizkiguten kalkulatu dute: Parisen urtean 25 ordu, Lyonen 27, Madrilen 30, Bartzelonan 39, Marseillan 40... Hurbiltasun geografikora jota, horiexek.

Bestelako batzuk esatekotan, okerren daudenak hauek dira: Indiako kostaldean 90 orduren bueltan galtzen dituzte urtean, Filipinetako hainbat lekutan ere horrelako zerbaitean daude, Ginean eta aldameneko herrialdeetan ere bai, eta Kuban, Habanan, 87 lo ordu galtzen dituzte urtean, Saudi Arabian eta inguruetan bezalaxe. 

“Ondoen” daudenak, hala kalifika badaiteke behintzat, munduaren ahalik eta iparrenera jotako lekuetako herritarrak dira. Dena dela, urtean 15 eta 20 lo ordu inguru kentzen dizkie beroak. 

Beste datu hau ere interesgarria da ikusteko nola gauden: urtean, bataz beste, 56 lo ordu galdu zituen munduko herritarrak. 

Hasi kalkuluak egiten. Demagun gauero 7 ordu egiten ditugula lo. Hala, 56 lo ordu galtzeak esan nahi du urtean zortzi gau oso lapurtzen dizkigula beroak. Asko da. Izugarri da. Benetan inportantzia emateko zifrak direla diote Climate Central taldeko ikerlariek. Arazoak adar ugari direla adierazi dute, baina bat nabarmentzekotan, azken bost urtetan biderkatu den problemetako bat da: gauetan ez direla etxeak hozten, kaleak (asfaltoa!) bero daudelako, eta bero hori botatzen dutelako. 

Aintzat hartzeko azken zertzelada bat ekarriko dizut, beraiek ere txostenean aitortzen dutena, eta poztu nauena: desfase handia dagoela hiri, auzo eta bizilagun batetik bestera. Desberdintasun sozialak eragin handia duela beroak lapurtzen dituen lo ordu horietan; aire girotua pagatu dezakeenak pagatzen du, eta ziur hobeto egiten duela lo.

Datuak zenbateraino diren ziurrak ez dakit, eta egia esan, oraintxe bertan, ez zait gehiegi axola 30 lo ordu diren, 20 edo 40. Gero eta jasangaitzagoak diren gau sargoriez hitz egiteko aitzakia izan zait gaur. Eta desberdintasun soziala ere mahai gainean jarri behar da larrialdi klimatikoaz hitz egiten dugunean, bai jakina.

·····>   Ez galdu hauek

• Eutanasia Legea. Heriotza lagundurako aukera zabaldu du Frantziak, legea onartu baitu bart Asanblada Nazionalak. Ez da, ordea, azken urratsa; orain Konstituzio Kontseiluak oniritzia eman behar dio. Hilabeteko epea du, eta posible da ñabarduraren bat egitea. Pazietearen gogoeta faseari buruzko helegitea du aztertzeke.

   

• Bestak Baionan. Programazio ofizialaren kontra korrontean, poztekoa da gero eta leku eta parte hartze handiagoa dutela besta alternatiboek Baionan. Aurten, estreinakoz, txosna ipini dute Mugimendu Sozialistak eta Gure Irratiak. Egitarau dotorea dute igandera bitartean.
   
• Faxistak Barakaldon. Duela egun batzuk txosnagunera hurbildu ziren eskuin muturreko hainbat kide, Voxekoak denak ere. Bideo bat grabatu gura zuten, txosnetako mezu politikoak kriminalizatzeko xedez. Kargu hartu zieten txosnetako kideek, eta Ertzaintzari deitu zioten faxistek. Voxek dio salaketa aurkeztu duela txosnaguneko kide baten kontra. Elkartasunez, eta gertatu dena salatzeko, txosna batzordeak elkarretaratzea egin du. 
   
• Taserrak debekatu. Akordatzen Santurtzin, duela bi aste, udaltzainen taser pistolak nola hil zuen Ander gaztea? Ostiral honetan manifestazioa egingo dute, operatiboan parte hartu zuten agenteak behin-behinean kaleratzea eskatzeko (ikerketak iraun bitartean) eta taser pistolak behingoz debekatzea exijitzeko.
   

Eta igande honi begira:

• Lurdes Iriondoren pastorala. Lehenbizikoz jendaurrean eskainiko dute igande honetan, Sohütan, Leire eta Intza Casamajou Elkegarai ahizpek idatzitako obra. Taldean 80 lagun inguru dira. Igande honetan izango da lehen saioa, eta datorren asteko ostiral eta larunbatean beste bana izango da.

· · · · · · ·

Tira, eta iragarpen bat egiteko aprobetxatuko dut. 

Urteroko moduan, abuztuan, 108 orrialdeko aldizkari berezi bat argitaratuko dugu asteroko aldizkariari atseden emanda. Atzodanik inprentan da Gakoak. Harpideduna bazara etxean jasoko duzu, eta bestela 9 euroan eros dezakezu gure webgunean, edo telefonora deituta. Baduzu promozio bat ere: uztailaren 24a baino lehen ARGIAko harpideduna egiten bazara, debalde bidaliko dizugu etxera.

Eduki freskoa, patxadaz irakurtzekoa eta denetarikoa dakar aurtengo Gakoak-ek. Abuztuan oporrak badituzu, edo irakurketari eskaini nahi badiozu izango duzun denbora, aukera ederra da hori.

Hauxe duzu editoriala; Gakoak-en aurrerapena.

Honaino gaurkoa.

Ostegun ederra izan. 

Besarkada bat.