Goierri aldean notizia da siderurgian aritzen den Arcelor Mittal multinazionalak bere laberik handiena itzali duela Olaberriko lantegian. Itzali du Oria ibaiaren ur eskasiagatik. Larunbatean amatatu zuen, eta buletin hau irakurtzen ari zarenerako segur asko piztu dute atzera ere, aurreikuspenak bete badira behintzat. Labeak txatarra erretzen du 1.600 gradu zentigraduko tenperaturan, eta Oria ibaiko ura erabiltzen dute makineria hozteko.
Itzalaldiaren eta prozesu tekniko guztiaren xehetasunak nahi badituzu, El Diario Vasco egunkarian dauzkazu irakurgai. Enpresako arduradunekin hitz egin dute, eta hondamendi baten bueltan egindako publi-artikulu baten tankera du gehiago. Irakurri dut Olaberrian eta inguruetan “ibaiari adi” segituko dutela, ibaia “funtsezko” delako... Enpresa ugariren makineriarentzat.
Faltan sumatu dut irakurketa osatuago bat. Labe galant hori ur eskasiagatik itzaltzen den estreinako aldia da, ados. Baina Oria ibaiaren osasunak makineria hozteko baino gehiagorako balio duela espero dut.
Antzerako zerbait gertatu da udan, Europan, Danubion. Kontinenteko bigarren ibairik luzeena ur faltan ibili da hainbat lekutan, tartean Errumanian, eta foku guztiak hor bertan jarri ziren esklusiboki motibo ekonomiko eta energetikoengatik: Errumaniako Gobernuak arroka batzuk leherrarazi zituen, aldameneko ibaietako ura Danubiora bideratzeko, bestela ezin zuelako herrialdeko zentral nuklearrik handiena piztuta mantendu.
