2026ko irailaren 4a.

Egun on.

Irailak 4 ditu jada. Ez da bromarik, eta aktualitatea ere ez dabil geldirik.

Goazen mamira.

Argindarrak berotuta

Betikoa da. Poltsikoa nabarmen ukitzen digutenean asaldatzen gara, amorraziotik bizi izaten dugu, eta orduan hasten da zergatiak azaltzeko bonbardaketa mediatikoa, Teleberrietako pantailak, infogramak eta denak. Bada, horretarako prest egon beharko dugula iradoki digute etorkizuneko merkatu deritzenek, prebisio ekonomikoak egiten dituztenek. Inork ez du gogorik honetaz hitz egiteko, baina energiaren garestitzeaz lau kontu jakiteak lagundu dezake azaroan derrepentean aditu bihurtuko den lagunari beste gerri batekin entzuteko. Horretarako, Goiener kooperatibako kideek ARGIAn publikatu duten artikulua irakur dezakezu; inork baino hobeto azaltzen dizute zer ari den pasatzen eta zer etor daitekeen.

Argindarraren ordukako prezioek eman dituzte pista batzuk udan: eguzkiak jotzen duen orduetan nahiko prezio arruntean egon da argindarra, baina gainontzean, eta batez ere haize zipitzik izan ez dugun udako gauetan, disparaturik egon da prezioa. Hainbat konturengatik. Batetik, argindarra sortzeko gas natural asko erabili dutelako; bere kostua garestitu egin da AEBek Iran bonbardatu zutenetik, eta Ormuzko itsasartea blokatuta dagoenetik, Europar Batasuneko gas-biltegiak ohi baino edukiera apalagoan baitaude. Eta bestetik, eta berriz ere uda honetako eguraldiari kasu eginda, arazo bat larriagotu da etxe guztietan: beroa. Horri aurre egiteko ohi baino energia gehiago kontsumitu da etxeetan, eta hala dela konfirmatu du Energiaren Euskal Erakundearen txosten berriak: iazko uztailetik aurtengora, ia %60 energia gehiago kontsumitu da. 

Goienerrek diosku aurreikustekoa dela argindarraren merkatuak “gorabehera handiak” izango dituela udazken eta negu honetan. Baina “gorabeherak”, gora egingo du gehiago behera baino. Ormuzko egoera korapilatzen ari zaie AEBei, eta ez dute amore emateko itxurarik; eta udazkenean sartuta, argi-orduak laburtuta eta eguzki-energia murriztuta, beste sorkuntza modu (ziurrenik garestiago) batzuetara jo beharko da. Haizeak freskatu beza poltsikoa.

· · · · · · ·

Arraunzalea bazara ziur interesatuko zaizula beste hau.

Atzo izan zen emakumezkoen Kontxako Banderaren sailkatze estropada, eta herenegun gizonezkoena. Igande honetan jokatuko da lehen jardunaldia, eta hurrengo igandean bigarrena. Jai horren guztiaren atariko, aurtengo ligan den-dena irabazi duten Arraun Lagunak taldeko Aiora Belartieta arraunlariarekin hitz egin du Goiatz Iza lankideak. Orain arteko jokatutako dena irabazi izanaren emozioez eta presioez hitz egin du arraunlari gazteak, denboraldiaurrean egindako prestaketa mentalaz, taldearen babesaz, emakumeek arraunean egindako urratsez… Arraunaz apenas jakinda ere erraz irakurtzeko artikulua da.

Kazetaritza independentea estimatzen baduzu, animatu proiektua babestera.
EGIN ARGIAKOA

·····>   Ez galdu hauek
  • 80 migratzaile hil. Noraezean eta erdi hondoratuta topatu dute migratzaile txalupa bat Kanariar irletatik gertu. Duela hilabete itsasoratu zen Gambian, 130 pertsona ingururekin. Salbamendu taldeek ontzia atzeman zutenean 44 pertsona eta bost gorpu zeuden bertan. 
     
  • ELA eta euskara. Ohi baino bilera aldrebesagoa izan zuen atzo ELA sindikatuak Eusko Jaurlaritzaren parte den Lan Harremanen Kontseiluan; sindikatuko eledunak euskara hutsean aritu ziren, eta beraiek eraman zuten itzultzailea, gainontzeko mahaikideek uler zezaten. Uztail hasieran iragarri zuen aurrerantzean euskaraz soilik hitz egingo zuela lan hitzarmen kolektiboak negoziatzen diren mahaietan. Erakunde publikoak interpelatzea zuen helburu, esparru erdaldunak direlako horiek; esaterako, Lan Harremanen Kontseilua. Atzo ez zuten itzultzailerik jarri.
     
  • Elkar argitaletxeko editorea. Itzea Urkizuk ordezkatuko du erretirora bidean den Xabier Mendiguren. Hain justu ere nobela berria idatzi du Mendigurenek, Morlans, eta prentsaren aurrean atzo aurkeztu zuen Urkizu aldamenean zuela; hala eman zuten albistearen berri.
     
  • Hauteskundeak Alemanian. Herrialdearen ekialdean, Saxonia eskualdean botoa ematera deituta daude herritarrak. Langabezia tasarik handiena duen eskualdea da, azkenaldian eskuin muturrak babes gehien lortzen duen lurraldeetakoa. Litekeena da agintera heltzea, edo gertu ibiltzea.

ASTEKO KOORDENADAK >>
 

Asteko gaien eta tendentzien bildumatxoa egiten dut ostiralero, iparrorratza hartuta, bestelako era batean sakontzeko.
  • I > Ikasketak. Ikasturtea hasi atarian, ikasleen hezkuntza maila behera egiten ari den usteari buruz jarri dituzte berbetan Aloña Garmendia irakasle eta zuzendaria, Ion Ander Maiz irakaslea eta Nora Salbotx maistra. Euskadi Irratian izan da. Askotariko iritziak azaleratu dituzte.
     
  • H > Herriko etxeak. Atzoko buletinean aipatu nuen Baionako eta Sarako herriko etxeekin jazo dena; euskara bertako hizkuntza ofizialtzat aitortu dute, funtzio sinbolikoa badu ere, baina auzitegiek atzera bota dute, konstituzioa besapean hartuta. Minduta agertu da Euskal Hirigune Elkargoa. Kazeta-n elkarrizketatu dute Hizkuntza Politiken lehendakariorde Antton Curutcharry.  
     
  • E > Eskola-itzulera. Aste honetan permititu ahal diet hezkuntza gaiei lautik bi atal eskaintzea. Beste era batekoa da Irati Goikoetxearen iritzi artikulu hau, El Correo-n, euskaraz. Umeei galdezka aritu da ea eskolara itzultzeko betarik ba ote dugun; ezezkoak jaso ditu denak. Errutinari diogun atsekabe horrez doa artikulua. 
     
  • M > Milaka. Mila hildako, milaka desagertu oraindik ere Nepalen, duela hamar egun pasa gertatu zen ibai arroaren hondamendian; zeinen erraz ahaztu zaigun. Bada, hondamendiaren berri zifra lazgarrien bidez eman da, hainbeste hildako eta hainbeste desagertu, baina Mikel Aramendik bestelako gauza batzuk kontatu dizkigu ARGIAn, argigarri gisa: non dagoen Nepal munduko mapan, munduarekin nola dagoen konektatuta, eta Txinak zein interes dituen.

Honaino gaurkoa eta aste honetakoa.

Izan ongi. 

Besarkada estu bat.

Ez zaude buletinera harpidetuta? Eman izena.

JARRAITU SAREETAN