Uste dut askotan ez garela batere kontziente eta poz txikia eman dit Davidek burua altxatu izanak Goliaten kontra. Akordatzen zara Nepalgo tragediaz, ezta? Sekulako luizi eta uholde bortitzak jasan zituzten duela bi aste, milatik gora hildako eta milaka batzuk desagertu eragin zituztenak, eta den-den-dena txikitu zen inguru hartan. Bada, Nepalgo Gobernuak justizia klimatikoa aldarrikatu du. Arrazoi osoz esan du mundu osoko berotegi efektuko gasen %0,1 soilik isurtzen duela berak, eta ados baldin bagaude hondamendia larrialdi klimatikoak eragin duela, kalteak kutsatzaile denek pagatu beharko lituzketela. Zifra jarri du: hogei milioi dolar.
Nazio Batuen Erakundeak badu duela lau urtetatik horrelako funts edo diru poltsa bat, klima larrialdiak eragindako txikizioak konpontzen laguntzeko helburua duena, baina ez daki inork oso ondo zenbat diru dagoen, ezta nola finantzatzen den ere, ez baitu inork aparteko dirurik jarri nahi, eta are gutxiago aldez aurretik.
Aspalditik dago ideia bat ikerlarien mahai gainean, ikusi nahiko nukeena ea estatu kapitalistaren bat gai ote den aplikatzeko. Kontua da aberatsetan aberatsenei zerga berezi bat jartzea, desberdintasun klimatikoa deiturikoa. Txiroenak direlako aldaketa klimatikoaren kalterik larrienak pairatzen dituztenak, eta kontrara, aberatsenak direlako gehien kutsatzen dutenak. Demagun, hortaz, ehun milioi euroko ondasuna baino gehiago dutenei zerga bat jartzen diegula, haien ondasunaren %1,5 eta %3 artekoa. Hala, segituan geneuzkake ia 30.000 milioi euro. Hori da 2023ko proposamen batek zioena, ikerlari frantziar batzuek gidatuta.
Bartzelonan egoitza duen beste ikerlari talde batek kasu egin zien frantziar horiei, eta beste zifra batzuk bilatu dituzte. The Lancet-ek argitaratu du orain. Esanguratsua da datua: lagin berari, hau da, ehun milioi euroko ondasuna baino gehiago dutenei %3ko zerga jarriko balitzaieke, 30 milioi pertsonaren bizitza salbatzeko moduan legoke mundua 2030a baino lehen.
