Beti kontrara planteatu izan da ideia, memoriari eta militantziari lotuta askotan, “ez dadila haria eten”. Baina gai honetan bai, eten dadila joder. Santurtziko Ander, Gasteizko Kerman, Gasteizko Aritz, Bilboko Etxarri II gaztetxeko Iker, Loiuko flotillakoak... eta Hondarribiko Babacar.
Gaurko egunean pentsatu nahi dut Poliziak ondo asko dakiela ez lukeela inor hil behar. Baina batzuetan begiekin ikusten dugu posible dela. Eta normalean ez dute aitortzen, baina bestetan bai. Ez barkamen eskean, ordea. Bingen Zupiria Segurtasun sailburuak hala esan du: “Poliziek ezin dute onartu pertsona bat herri erdigunean jendea mehatxatzen ibiltzea, eta jokatu behar zuten bezala jardun zuten”. Alegia, western batean gaudela, edo zer? Bai Santurtzin eta bai Hondarribian buru osasuneko arazoak pistola batekin konpontzen dituzte antza, eta ez medikutan edota gizarte zerbitzutan.
Santurtzikoaren antzekotasunik badu Hondarribikoak. Bi kasuetan, lehen bertsioan esan da “gatazka” bat dagoela oinarrian; “borroka” batean sartu zen Ander, eta “tiroketa” batean hartu zuen parte Babacarrek (jaso bakarrik egin zituen berak, baina tira). Bigarren puntua: bi kasuetan polizia agenteak zauriturik suertatu dira. Eta hirugarrena: Babacarri tiro egin zion polizia kargutik kendu dute. Ez dute, ez, pertsona bat hiltzeagatik espetxera bidaliko.
Nola espetxera, bada, sareetan heroi moduan ere hartu dute-eta ia-ia. Babacarrek beldurra eragiten zuela, sekulakoak egiten zituela... Telebistako erreportariek ekarri dizkigute halako piezak norbere etxeko sofara, eta leku berberetik horiek baino okerragoak esaten ari dira, adibidez, El Diario Vasco-ren iruzkin txokoan.
Gai potoloa da arrazakeriarena.
- Irungo Harrera Sareak esan digu arrazakeria eta bazterkeria pairatzeko egiturazko baldintza guztiak betetzen zituela Babacarrek, kanpotarra zela, beltza zela, pobrea zela, eta buru osasuneko arazoak zituela.
- Eta senegaldarren elkarteko Awa Seck-ek berriz, hauxe: “Babacar ezin digu itzuli, hilotz bat bueltatuko diogu familiari, baina justizia bai egin daiteke”.
Arduradunen artean Igor Enparan alkatea izan zen lehena esaten, eta bat etorri dira bai Irungo Harrera Sarea eta bai senegaldarren Mankosengal elkartea: gizarteak eta sistemak egin du huts, buru osasuneko gaitzak ez baitira tiroz konpontzen.
