Egun on.

Ilusio handia egiten digu hau iragartzeak: publiko egin dugu hemeroteka berria, 1919tik gaur arteko ARGIAren eta Zeruko Argia-ren aldizkari, urtekari eta argitalpen guztiak. Larrun zaharrak eta komikiak. Gerra aurrekoak eta erbestekoak ere bai. 

Hemen daukazu dena. Eta bideo labur honetan egin dezakezu hurbilpen bat gure iraganera, esanguratsuak iruditu zaizkigun azalak hautatu baititugu.  

Urte dezentetako lana izan da ale zaharrak aurkitzea, biltzea, antolatzea, eskaneatzea eta txukun digitalizatzea. Orain arte, webgunean, 2002tik gaur arteko edukiak geneuzkan soilik, baina orain 1919ra bidaiatu dezakegu, kontsulta ditzakegu duela 40 urteko Politika saileko orriak, duela 60 urteko Kulturakoak, azalak, garaiko gizartearen islak... 

Gauza ederra da memoria, memoria kolektiboa, eta uste dugu eduki guztia libre eta giltzarraporik gabe jartzea inportantea dela gure gizartearentzat, gure hizkuntzarentzat. 

Otsailean egin genuen publiko Fototeka, 100.000 argazkiko artxiboa, libre eta doan kontsultatzeko eta deskargatzeko. Hemeroteka berri honekin, orain, ondareari lotutako bi proiektu handienak biribildu ditugulakoan gaude. Egia esan, oso pozik gaude.

Hori bai. Ez zen posible izango ARGIAren komunitaterik gabe. Eskerrik asko.

Iragarpen eder honen ostean, gogotsu ekin diezaiogun ostegunari.

Goazen mamira.

Aurrekaria?

Hilabete barru hasiko da klima larrialdiaren inguruko Cop31 goi-bilera. Australian eta Turkian egingo da eta hamabost egun iraungo ditu. Auskalo, lagunok, zenbat hegaldi hartuko diren jende hori dena leku berean elkartzeko, eta ez dakit, egia esan, zergatik hautatu diren 15.000 kilometroko distantzian dauden bi herrialde, ez bada praktikan gehiago kutsatzeko. 

Tira, kontua da, inoiz baino hobe esanda, giroa berotzen ari dela. Hainbat talde ekologistek salatu dute bi estatu horiek direla munduan CO2 gehien kutsatzen dutenetakoak. Eta hortaz, nola demontre izango ote diren klima larrialdiari aurre egiteko goi bilera inportante baten anfitrioi. 

Turkiak ez dio deus, itxurakeriarik egin gabe erregai fosilen kontsumoa handitzen segitzen baitu, eta Europako herrialderik kutsatzaileena da; baina Australiak greenwashing-a era agerikoan egiten du. “Erregai fosilen aroa bukatu egingo da”, esan zuen aurreko goi bileran Australiako ordezkariak, eta aldi berean argi berdea eman zion meatzea ustiatu eta ikatza ateratzeko izugarrizko proiektu handi bati. Ea, proiektua martxan zegoen aspalditik, baina lizentzia aurten iraungitzen zaienez, beste 22 urtez jarraitzeko baimena eskatu zuen enpresak, ekoizpen ahalmena asko handituta gainera.

Aste honetan, baina, Australiako organo judizial gorenak ontzat jo du komunitate batek jarritako salaketa. Demostratu dute ez dituztela ondo kalkulatu meatzearen isuriak. Izan ere, komunitate herriak argudiatu bezala, meatze baten ingurumen inpakturik handiena atzerrian ematen da, ikatza erretzen denean, gehiengo zabala Australiaren mugetatik kanpo, beraz. Eta hori ez dute kalkulatu, eta auzitegien ustez kalkulatu egin behar da. Hori gabe ezin baita esan proiektu baten kutsatze mailak “legediaren barruan” daudenik. Estreinako aldia da horrelako ebazpen bat egiten dela hain eskala handian.

The Guardian egunkariak elkarrizketatu du salaketa ipini duen ekintzaileetako bat, eta argi dio tipoak: “Ezin dugu ikatza erauzi, atzerrian saldu, klima larrialdia nola areagotzen duen ikusi, eta besterik gabe esan horren eraginek ez dutela zerikusirik gurekin eta ez digutela guri ere kalterik sortzen”. 

Sententzia hori aurrekaria izango ote da? Hortik planteatu du artikulua Berria-ko Iñaut Mautauko kazetariak.

·····>   Ez galdu hauek

• Etxebizitzaren greba orokorra. Sindikatu abertzaleak batu egin dira Hego Euskal Herrian azaroaren 11rako deitutako deialdira. Espainiako Maizterren Sindikatuak deitua da, eta sindikatu guztiek babestu dute dagoeneko. ELA, LAB eta ESK-k esan dute greba Euskal Herriko markoan jorratuko dutela.

  Portzierto. Atzo arratsaldean hil zen Maricarmen, etxetik kaleratu eta etxebizitza krisiaren aztoramendua sortzea eragin duen Madrilgo andrea. 87 urte zituen eta ospitalean zegoen etxetik kanporatu zutenetik. 
   

• Frantziako Konstituzioa. Hizkuntza gutxituak aitortuak izan daitezen, 2. eta 34. artikuluak aldatzea proposatu dute bi diputatuk, Peio Dufau euskaldunak eta Paul Molac bretoiak. Parlamentari ugariren babesa lortzen hasiak dira, eta asmoa dute udazken honetan Legebiltzarrean gai zerrendan sartzeko.
   
• Taxilariak Uber-en aurka. EAEko 500 taxilari inguru Donostian elkartu ziren atzo, eta hiriaren erdiguneko errepideak blokatu zituzten, kexu baitira Uber-etako langileek ez dituztelako arauak betetzen, eta ez dutelako zigorrik jasotzen. 

Bide batez, gaur, urriaren 7aren biharamunean, Gernika-Palestinak deituta, ehun udaletxe atari baino gehiago beteko dira Palestinaren aldeko aldarriz, genozidioa salatzeko. 19:00etan dira hitzorduak.

Honaino gaurkoa.

Ostegun ona izan. 

Besarkada bat.