Egun on.

Zer moduz iritsi zara ostiralera?

Ni neu, irribarre handi batekin. Oporrak hartzen baititut. Pentsatuko duzu: orain ere oporretan? Ekainean jokaldi bera egin bainuen... Tira, udan opor gutxiago egitearen ordaina da. Edo oparia, hobe esanda. Astebeterako atsedena urri erdian. Badut gogoa.

Datorren astean, beraz, ez da buletinik egongo. Urriaren 19an itzuliko naiz. Ondo ibili anartean.

Benga, noan ostirala hastera. Albiste on batekin, gainera.

Euskararen aldeko ebazpen judiziala

Behingoagatik notizia on bat euskararentzat. Eta nondik, eta epaitegietatik. Gorde mezua, zeure buruak ez baitu sinetsiko hilabete batzuk barru, zoritxarrez euskararen aurkako oldarraldiak segituko baitu.

EHUren aldeko ebazpen judizial bat heldu da, selektibitateko euskara azterketen harira. Bai, Euskarako azterketan 0, edo 1, edo berdin zait zer kalifikazio atera zuten ikasleei, errekurtsoa jarri zutenei, ez zitzaien salbuetsi behar nota hori batez bestekoa egitetik. Alegia, A ereduko ikasle erdaldunek zeroa jaso bazuten Euskarako azterketan, ba merezi zutelako jaso zutela, eta ez zitzaiela nota hori ipini inolako diskriminazio asmoengatik. 

Hori bagenekien. Nobedadea da epaileek ere guk bezala pentsatzea.

• Xextra politiko galanta sortu zen egun horietan. Gogoan izango duzu zeinen baldar posizionatu zen EAJ, unibertsitateari “gardentasuna” eskatzen, nolabait ere ulertarazten trapu zikinak-edo egon zitezkeela. Eta kontxo, ez da egokia Jaurlaritzako alderdi nagusia horrela mintzatzea bere menpeko unibertsitateaz. Orain, ordea, tankera du eskua gordetzen ari direla jeltzaleak, atzo Euskadi Irratian entzun baikenuen Unibertsitate sailburua, Juan Ignacio Pérez Iglesias, EHU beti babestu dutela esanez. 

Ikasle erdaldun haiek berrikuspena eskatu zuten lehenik, ez zitzaien nota apenas aldatu, EHUk esan zuen kalifikazioak ongi jarrita zeudela, eta hori ikusita, giroa gehiago aztoratzeko, salaketa ipini zuten. Eta epaile batek “behin-behinean” onartu. Bi kontu agindu zizkion EHUri: Euskara azterketako emaitza aintzat ez hartzea, eta salaketa ipini zuten ikasleek hautatzen zuten graduan plaza gordetzea. 

Zalapartaren ondoren, azkenean, propio zenbati sortu zaien plaza? Aste honetan jakin dugu eta kontatu dizut: pertsona bakarrarentzat sortu da plaza. Gainontzeko guztiak ez dira EHUn matrikulatu, edo matrikulatu badira ere Euskarako zeroarekin berdin-berdin sartzen ziren graduan.

Berariaz sortu den plaza hori EHUk esan zuen ez zela bidezkoa, eta “behin-behinean” sortzen zuela, epaitegietako bidea amaitu arte. Orain, hortaz, zer gertatuko da? Ikasle hori kanporatzea eskatzen du legeak… baina zer nolako burrunba sor daiteke?

Ez dago dudarik, ordea, ebazpen honekin aurrekari indartsu bat sortzen dela euskararentzat. Babes eta berme bat. Tira, erdarekin sekula planteatuko ez litzatekeena.

Gure hizkuntzak funtsezko ditu euskara hutsezko proiektuak.

Bide batez, eta notizia onei eta euskarari segika... 

Etxe berri bat du euskarak Bilboren bihotzean, Kafe Antzokiaren pareko espaloian: Hiribil gunea izena du. Zenbat Gara elkarteak bultzatuta sortu da eta helburu du euskalgintzako eragileak elkartzeko espazio bat izatea, harremanak egin eta sinergiak lantzeko, bilerak egiteko, formazio eta mintegietarako... Euskal Herri mailako dinamikak Bilbotik ere pentsatuak izateko, alegia. Eta Bilbotik bezala, beste hiriburuetatik ere bai. Baionako On Bilgunea ezagutzen? Hori ere berria da eta funtzio bertsua dute. 

Atzo iluntzean egin zuten irekiera ekitaldia, eta bertan izan zen Maria Ortega lankidea. Teklei ematen eta artikulua biribiltzen ari da hau irakurtzen ari zaren unean. Aurrerapen gisa, Pello Maudok eginiko argazki bat ekartzen dizut.

Tira, eta hain pozik gu, atzo, Hemeroteka berria aurkeztuta, oso gustura gaude jaso dugun harrera beroarekin. Lagun pila bat aritu zarete kuxkuxeatzen, paper zaharretan zokomiran, eta estimatzen da, benetan, hautematea jendeak estimuz hartu duela egindako lana.

Hedabideetan ere izan du oihartzuna. Urtzi Urkizuk artikulu eder hau idatzi zuen Berria-n, Sustatu-n ere aitortu dute ikusmiran aritu direla eta estimuz hartu dutela, eta Euskadi Irratitik deitu gintuzten azalpenak ematera sartzeko. Lander Arbelaitzek hitz egin zuen; hemen entzun dezakezu, 42. minututik aurrera. 

·····>   Ez galdu hauek

• Torturaren biktimei laguntza. Iker Aristu zena hartu du gogoan Nafarroako Torturatuen Sareak, eta agerraldia egin, laguntza behar duten torturatuei mezua bidaltzeko: zauriek eta orbainek beti hor segitzen dutenez, elkar zaintza inportantea dela.
   
• Nekane Txapartegi. Suitzan bizi da euskal preso eta iheslaria, ARGIAn iritzigilea. Urri hasieran Agentinara joan zen emakume eta sexu disidenteen topaketetan parte hartzera, hizlari moduan, baina Argentinak deportatu eta atzera bidean ipini du.  
   
• Ibone Bengoetxea. Bizkaiko Ahaldun Nagusirako hautagai izendatu du EAJk, Elixabete Etxanobe baztertuta. Jaurlaritzan ari da Bengoetxea; Kultura eta Hizkuntza Politikarako sailburu da. Udazken eta negu honetan egostekoak dira bere saileko bi lege garrantzitsu: administrazioan euskara indartzekoa bata, eta Kulturaren Legea bestea. 
   
• 49. Euskal Zine Bilera. Datorren asteazkenean hasi eta asteburura arte iraungo du Lekeitioko jaialdiak. Euskaraz egindako lanen erakusleihoa da. Hogei lan lehiatuko dira. 
   
• Anne Carson. Idazle kanadar beteranoak jasoko du Literaturako Nobel Saria. Obra oso zabal baten egilea da, eta euskaraz liburu bat dago irakurgai, Joxe Mari Berasategik itzulita: Gorriren autobiografia.

Honaino.

Ostiral ederra izan, baita asteburua ere, eta astebeteko etenaren ondoren itzuliko naiz, urriaren 19an. 

Hegoaldekoa bazara eta zubia baduzu, probestu. ARGIAn lan egingo dute jai egun arrotzean.

Izan ondo. Besarkada bat.