Ez da kazetaritzaren jardunbidea suposizioak egitea, oinarririk gabeko hipotesiak zabaltzea, baina jauzi egitea tokatzen da batzuetan, nahiz jauzi laurden bat izan Espainiako prentsak egin ohi duenarekin alderatuta. Zorionez, ordea, Poliziaren ustezko filtrazioez aparteko informazioa daukagula esan dezakegu: Zigor Olabarria lankideak “terrorismoagatik” espetxean dauzkaten bi gazteetako baten abokatuarekin hitz egin zuen atzo arratsaldean.
Errepasa ditzagun tempoak: irailean errepideko kontrol batean gerarazi zituzten, iragan larunbatean Irungo polizia-etxean aurkeztu eta atxilotu zituzten, atzo Madrilera bidali, Audientzia Nazionaleko epailearen aurretik pasatu, eta behin-behineko espetxealdi ezarri zieten.
Bi kontu deigarri egon dira hasiera-hasieratik, leporatzen zaizkien karguen zergatia: bata, “armak eta lehergaiak fabrikatzen” zituztela, eta bestea, Euskal Herriko hainbat polizien eta guardia zibilen “informazioa” zutela. Bada, bien inguruan galdetu dio Zigor lankideak Aratz Estonba abokatuari, eta hona erantzuna:
- “Armak”. Bideo bat aurkitu diete, zeinetan atxilotutako bi pertsonak ageri diren estintoreak edo su-itzalgailuak pinturaz nola bete erakusten. Hori da “arma” kontsideratzeko motiboa, bai behintzat abokatuei erakutsi dietena.
- Eta “polizien informazioa”. Honek dirudi katramilatsuena. Zeren bai, polizien informazioa zuten, polizia agente horiek herri mugimenduetan infiltratuta daudela uste dutelako, beraiek parte diren taldeetan. Hain justu ere errepide kontrolean atzeman zituzten egunean hainbat herritan egon ziren, hala nola abokatu, kazetari eta herri mugimenduetako beste kide batzuekin, detektatuta zituzten ustezko polizia infiltratu horiek kontrastatzeko eta nola argitaratu edo horrekin zer egin pentsatzeko. Paperak atzeman zizkieten.
El Mundo egunkaria buru, makina bat ustezko hedabide ari dira bi gazteen argazkia zabaltzen, izen-abizenak ematen, eta hor zehar irakurtzen duten komentario oro albiste bihurtzen. Ezer berririk ez. Eta ezer berririk ez Guardia Zibilaren eta terrorismoaren biktimen Espainiako elkarteen partetik ere: notiziak salto egin orduko esan zuten akusazio partikular gisa aurkeztuko direla.
Hauteskundeak dira laster Espainian.
- Kataluniako independentismoan eta etxebizitzaren mugimenduetan infiltratutako polizien kasuak gogorarazi dizkit kontu honek. Badakizue nola doan kasua? La Directa epaitegietan dago, agentearen izen-abizenak argitaratzeagatik isuna jarri baitie Datuen Babeserako Espainiako Agentziak, eta uko egin dute pagatzea.
