Egun on.

Zer moduz zure asteburua? Ongi joan dela espero dut. 

Urriko azken astelehena gaurkoa. Egun dotorea espero dute Gernika-Lumon, azoka majoa. Guztira 251 postu izango direla irakurri dut, horietako 42 gaztari eskainita.

Goazen mamira, albiste bitxi batekin.

Basoan, urrea

Ondo jo dute perretxikoek azken boladan, e? Neuk bezalaxe izan al duzu zortea egunotan bildutako aleren bat dastatzeko? Neu ez naiz mendira joan, baina sukaldera heldu zaizkit; hori da luxua, hori.

Tira, onddoen kontua ezin hobeto zetorkidan albiste bitxi hau buletinera ekartzeko. Kontua da, Norvegian, iruzurgile batzuk hainbat herritar konbentzitu dituztela urrea erosteko eta lingoteak basoan ezkutatzeko, zuhaizpean, hitzemanda haiek zainduko zituztela. Eta jakina, gezurra. Iruzurra. Ez da kasu isolatua izan, Norvegiako hainbat hiritan gertatu da azken hilabeteetan, estimazioen arabera ehun milioi euro inguru lapurtu dituzte dagoeneko, eta horregatik, kanpaina abiatu du banka entitateen patronalak inor gehiago ez dadin amarruan jausi.  

Katastrofismoari lotuta doa iruzurra. Bizitza hain dago garesti, sistema kapitalista hain dago gaizki, eta ekonomia hain desorekatuta, iruzurrean jausi direnei “larrialdi egoerarako soluzio” gisa aurkeztu zaiela urre lingoteen inbertsioa. Zeren aurrezkien balioa galtzen ari da, eta inbertsioek eta finantzaketek ez dute lehen bezalako irabazirik ematen, hori hala da, eta horrekin jokatuta, iruzurgileek zurrumurrua zabaldu dute esanez urrearen balioa asko handituko dela etorkizunean. 

• Interneten begiratu dut urre gramoaren prezioa 115 euroan dagoela orain, eta nazioartean “ohikoena” omen da urre ontza bat erostea, 31 gramo pasatxoko neurri estandarrekoa, hau da, ia 3.600 eurokoa. Hortik ehun milioi euro urre basoan lurperatzera badago koska. 

Nolako iruzurra, halako gizartea. Iruzur maila absurdoetan jausten den gizartearengandik zer espero behar dugu, bada.

Urrezko kazetaritza egiten dugula esatea gehitxo da, baina ahalegintzen gara.

Fasez goratuta

Finalaurrekoetan sartu da Euskal Herriko Bertsolari Txapelketa. Giro ederra zegoen larunbatean Lekunberrin. Kiroldegia gainezka. Jakina, bi hilabete ere ez dira geratzen Iruñeko finalerako. Eta ikusmina ere bazegoen, zeren fase honetan batu dira lehiara aurreko edizioko zazpi finalistak, eta Lekunberrin kantatzea tokatu zitzaien Amets Arzallusi eta Beñat Gaztelumendiri. Ikusmina zegoen zer mailatan iritsiko. Eta oso indartsu ikusi zitzaien. Besteengandik koska bat gorago, baina lan egin behar izan zuten. Arzallus gailendu zen. Hemen duzu kronika. 

Finalaurrekoak hasi bezala, ARGIAn ere hasi gara jarraipen berezia egiten. Neuri egokitu zitzaidan zazpi finalaurrekoetako lehenean egotea, eta hurrengora Maria Ortega lankidea joango da. Bion artean banatu ditugu lanak. 

Idatzizko atala osatu dugu gaur Oihana Aranaren analisiarekin, bertsolariak banan-banan aztertu dizkigu eta Poesia oposaketak titulatu; eta gauean, badakizu, BTLN Betelana bideopodcasta estreinatuko dugula Oihanarekin berarekin, Lide Arregirekin eta Asier Galarzarekin, Danele Sarriugartek gidatuta. Zapatuko saioa aztertuko dute umore zorrotzetik. 20:00etan eskegiko dugu gure sareetan.

·····>   Ez galdu hauek

• Protesta Baionan. Bost mila laguneko manifestazioa egin zuten larunbatean, bizitzaren garestitzearen eta murrizketen kontra, eta justizia sozialaren alde. Negarra eragiteko gasa behin baino gehiagotan erabili zuten jendarmeek, eta hamar atxilotu zituzten.  

  Debekuen gainetik, gainera, Frantzia osoan ehunka mila izan dira mobilizazioetan parte hartu dutenak. Gobernua ahalegindu da protestak indarkeriarekin lotzen, diskurtsoak entzun eta komunikabideak ikusi besterik ez daude, baina sintonia baketsua dute aldarriek. Poliziak darabil esku gogorra. Parisko Errepublika Plazakoa ikusi besterik ez dago: gazte orkestra bat egun argiz The Hunger Games-eko kantua jotzen, eta negarra eragiteko gasa jaurti zuen Poliziak.
   

• Etxegabetzea Gasteizen. Indarkeria erabili zuen Ertzaintzak ostiralean, Santsomendi auzoan, sei seme-alabako familia kanporatzeko. Gaur, ARGIAn, Gasteizko beste kasu baten berri dakarkigu, Mariturrikoa: nola geratu diren putre funts baten esku lau eraikin oso, 96 etxebizitza, eta zeren beldur diren, zer zantzu dituzten. Bizilagunak elkartzen hasi dira, protesta antolatzen.
   
• Hauteskundeak Brasilen. Lula da Silva ezkertiarra gailendu zaio Flàvio Bolsonaro ultraeskuindarrari, Jair Bolsonaroren semeari, hau da, estatu kolpeagatik kasik hil arteko zigorra betetzen ari den tipo haren oinordekoari. Oso-oso estua izan da zenbaketa, une batean bat eta gero bestea ipini baita aurretik. Botoen kontaketa %75era iritsi arte, %1eko aldea baino ez zuen Lulak. Azkenean, lau milioi botoko diferentzia (125 milioi eman dira). Motela izan da kontaketa, eskuinak sabotajeak egin baititu hainbat lekutan. 125 milioi pertsona inguruk eman dute botoa.

Honaino gaurkoa.

Egun ona izan.

Besarkada bat.