Egun on.

Zer moduz asteburua? Ondo? Hala espero dut.

Goazen mamira.

Euskararen alde, txokolaterik ez

Hauteskunde kanpainaz hitz egin nuen ostiralean. Aitortzen dizut marko espainiarrean mugitu nintzela neu ere, eta uste dut panorama horrelaxe dagoela, naziotasunean oso apal. Baina agendan euskal gairik kokatu badago, interesik balego behintzat. 

Erreferente ona da Bidasoaz gorako herrikideena: 300 hautetsik bat egin dute euskararen koofizialtasun eskaerarekin, Frantziako Konstituzioaren 2. artikulua aldatzeko proposamenarekin, frantsesak segi dezan Frantziako hizkuntza izaten, baina legez aitor dadila hizkuntza gutxituak badirela, eta horiek, tartean euskarak, zaintza berezia behar dutela. Baina hori ez da posible zentralismoan, are gutxiago Pirinio Atlantikoetako prefeta euskarafobo sutsua denean. Apustu esanguratsua da Ipar Euskal Herriko euskalgintzarena, hautetsiena, eta bide horretan urrats aipagarria izango da larunbateko zita Baionan, koofizialtasunaren aldeko mobilizazioa.

Lurraldearen soziolinguistikak eragina du, baina praktikan alderdien interesen arabera erabakitzen da hauteskunde kanpainetan euskararen gaia erdigunera ekarri edo ez. Botoak non, diskurtsoak han. Beharbada boto horien kutxatilak definituta daude lehendik ere, eta kontentu gara horrekin?   

PSOEk desmobilizazioa eragiten du ezkerreko mugimenduetan, adibidez hizkuntzaren aferan, harrotasunez eta lotsagabe diotelako euskara maite dutela, Europan koofizialtasuna eskatzen dute gainera, Espainiako Gobernuak bere webgunea euskaraz jartzen eta parlamentuan euskaraz hitz egitea ahalbidetzen du... Jakina botoen premiak behartuta egiten dituela PSOEk mugimendu horiek, baina partxeei esker euskara hobeto al dago gure plazetan?

Espainiako hauteskundeak igaro eta lau egunera izango da abenduaren 3a, Euskararen Eguna. “Ospatu” egingo dugu? Ze motibo dugu jai girorako?

Eztabaida leiho interesgarria zabaldu du asteburuan Donostiako Txominenea auzoko euskaltzaleen elkarteak. Idatzia plazaratu dute, inor konkretuki seinalatu eta haserretzeko asmorik gabe, baina lerro artean esanda euskaldunok ezin dugula (soilik) txokolatadak egiten jarraitu Euskararen Egunean. Honela diote: “Pizkunde indartsu bat sortu nahi badugu, Euskararen Eguna berrezaugarritzea eta edukiz betetzea ezinbestekoa dugu”. Hau da, ospakizuna bale, ados, baina kontzientziak piztu ere egin behar dira, eta abenduaren 3a bera “borrokarako egun” bihurtu. Adibidetzat dakarte mugimendu feministak Martxoaren 8ari emandako garapena.

Ordaindu nahi duzuna. Jaso nahi duzuna.

Selekzioaren ofizialtasuna

Gizonezkoen futboleko Euskal Selekzioak lagunarteko partidua jokatu du Venezuelaren aurka asteburuan, Bilbon, San Mamesen (1-0 irabazi du). Iaz data bertsuetan Palestinaren aurka jokatu zuen, eta ofizialtasunak jasotako bultzada beroaren olatuari segida eman nahi izan dio federazioak, besteak beste, gauzak ondo eginda, egun batzuk lehenago entrenamendu saioa Donibane Lohizunen prestatuta, naziotasuna hauspotzeko.  

36ko Gerrako erbesteko Jaurlaritzak 90. urteurrena bete du aurten, eta egungo gobernuak hura oroitzeko antolatu dituen makina bat ekitaldiren artean, futbol partidu hori bat gehiago izan da, baliatuta nazioarteko futbol selekzioek haien partiduak zituztela. 

• Horri lotuta, interesgarria izan dira Oihan Sancet iruindar gazteak Espainiako prentsari gaztelaniaz egindako adierazpenak: “Euskal selekzioaren ofizialtasunaren alde nago, eta ilusioa egingo lidake noizbait Mundiala jokatzeak”. Eta horrek sutu ditu eskuindar futbolzale tertuliakideak: “Hori esaten du Espainiako selekzioak deitzen ez diolako”.

Beno, larunbatean olatu berde handi batek hartu du Bilbo, ofizialtasunaren aldarriaren kalejiran. Irudi ederra eta giro aparta, euripean bazen ere.

·····>   Ez galdu hauek

• EH Bildu. Euskal Selekzioaren kalejiraren aldi berean, larunbatean Bilbon, “antifaxismoaren botoa” defendatu du EH Bilduk. “Euskal Herria defendatu” eta “itxaropenaren gobernuak eraikitzera etorri gara” gisako ideiak aldarrikatu dituzte 40.000 lagunek. 
   
• Julio Soto. Fresko eta jostari, Miarritzeko saioa irabazi du gorritikoak, Sustrai Colinaren aurretik. Hemezortzi bertsolarik eman dute pausoa bigarren eta finalaren aurreko azken fasera. Hiru saio izango dira, Donostian, Gasteizen eta Bilbon, datorren larunbatean hasita.
   
• Saski Baskonia. Bihar gauean Tel Aviveko Hapoel taldearen kontra jokatuko du Euroligako partidua, eta protesta iragarri du Palestinarekin Elkartasunak, martxoan egin bezalatsu. Orduko hartan ateak itxita jokatu zen, protesten eraginez, baina oraingoan abonatuek soilik sartuko ahalko dute Buesa Arenara, txartelarekin batera NANa ere aurkeztuta. Ez da sarrerarik salduko. Jokabide horrek Israelgo Estatua normalizatzen duela salatu dute.

Honaino gaurkoa.

Astelehen ona izan. 

Besarkada bat.