Filipe Aramendi joan zenetik, Urruñako loreak motozerra batez mozten ari da Herriko Etxea. Martxoan heldu zen agintera Sébastien Etchebarne, autodefinizioz zentrista, “irakaskuntzan indar handia” ipintzera zetorrena, kanpainan zin egin zuenez. Bada, apirilerako iragarria zuen elkarteei dirulaguntzak murriztuko zizkiela. Eta zeintzuk dira elkarte gisa izendaturikoak, lerro horretako ekarpenak jasotzen dituztenak? Euskalgintzako eragile ugari. Maiatza hasterako bagenekien Urruñako ikastola izango zela kalteturik handiena: 22.000 euroko laguntza progresiboki kenduko zitzaiola aurreikusi zen.
Ez da Urruñako ikastolaren dirulaguntza lerro bakarra, baina “dirulaguntza soziala” deitzen zaiona, Aramendirekin indartu zena, desagertu egingo da 2030erako. Orain arte, ikasle bakoitzeko 1,90 euro ematen zizkion Urruñako Herriko Etxeak ikastolari. Datorren urtean 1,50 eurora jaitsiko da, 2028an euro batera, 2029an 50 zentimora, eta 2030ean zerora. Hau da, ia 23.000 eurotik zerora.
Zer dio Etchebarne auzapezak? “Ekitate” kontuagatik egiten duela, “eskola guztien berdintasunarengatik”. Zeren egia da, ikastetxe katolikoari ere eragiten dio, eta elkarte gisa erregistratutako guztiei ere bai. Baina kaltetu handiena ikastola da. Neurriz txikiagoa delako, ez dituelako besteek bezainbeste familia, eta halakoetan, gero eta jende gutxiagoren larrutan egon zauria, orduan eta min handiagoa egiten du.
- Herriko Etxearen laguntzaren faltan, zein da soluzioa, kuotak igotzea? Familiek gehiago ordaintzea? Eta hortaz, familiak galtzea?
Tira, normala denez galdera horiei ez die erantzunik eman nahi Unai Villacorta ikastolako zuzendariak. Protestan ari dira orain. Asteartero mobilizazioak egiten guraso eta irakasleak, ikastolaren alde, jakina, baina oinarrian euskararen eta euskalgintzaren alde.
Berdintasuna beti izango da fartsa bat bi gauzek abiapuntu bera ez dutenean.