Donald Trumpen nahietara sorturiko Munduko Bake Batzordeak atzo egin zuen lehen bilera, eta gizon gorbatadunak baino ez ditut ikusi nik argazkian. Bada emakumerik, bai, baina ez dakit hitz egin zuten ere. Trump eta Israelgo ordezkaria flirtean ikusi nituen nik atzo, Gazaren berreraikuntzaz lerdokeriak esaten. 10.000 milioi dolar jarriko omen dituzte “dena txukuntzeko”. Baina ez omen da asko, argi izan dezagun denok. “Bi asteko gerra batek soilik askoz ere diru gehiago balio du”, dio Trumpek. Tabernako komentarioak dirudite, baina zoritxarrez ez da horrela. Aldamenean zegoen saltsa guztietan egotea gustatzen zaion leloa, Gianni Infantino, FIFA munduko futbol federazioko presidentea. Tipoa, koinatuetan koinatuena, han azaldu zen adimen artifizialak egindako bideo narras batekin, esatera estadio mordo bat eraikiko dituela eta gazatarrek laster jokatu ahalko dutela futbolean.
Yankiek bake-propaganda hori hedatzen dute handik eta hemendik, aldi berean Iranera armada bidaltzen duenean. Antza, “berehalakoa” izango da estatubatuarren esku hartzea Iranen. Edo gutxienez mehatxu propagandistiko horrekin ari da jokatzen Trump. Iranek ez dirudi AEBen aurrean makurtzeko betarik duenik.
- Bien bitartean, Kuban, gauzak ez daude batere ondo. Aspaldiko krisirik larriena bizi dute: petrolio gabe geratzen ari dira, eta oinarrizko zerbitzu mordo bat kolokan daude. Gerra egoera deklaratu dute. Sei hamarkada daramatzate AEBen blokeoa jasaten, eta horretara “ohituta” daudela esatea agian gehitxo da, baina oraingoa beste kontu bat da. Maria Ortegak artikulu honetan kontatzen du.
