Egun on.

Zer moduz selektibitateko notak-eta? Ja ofizialki kurtsoa amaituta gehiengoa, hamar egun baino ez dira geratzen udako solztiziorako... Nik, aurretik, oporrak ditut. Azkenaurreko buletina da hau niretzat; datorren astea jai hartuko dut. Sarri egiten dut horrela kontziliazio kontuengatik. Ekainaren 22an itzuliko naiz, San Joan bezperaren bezperan.

Badugu gai jostaririk (eta lotsagarririk) gaur. 

Goazen mamira. 

· · · · · · ·

Enuntziatu ona ala enuntziatu euskalduna? (eta II)

Asteleheneko buletinean kontatu nizun Gasteizko Udaleko lan deialdi publikoen azterketen asuntoa: etsamina euskaraz egitea hautatu zutenei, azterketa baino hilabete lehenago, mezu bat bidali zien udalak, gaztelaniaz egitera “gonbidatzeko”. Zeren, lan eskaintza publikoen deialdi asko eta askotan bezalaxe, hor ere ez zegoen ikasmaterial guztia euskaraz (eta behin izena eman eta hizkuntz hautua egin ondoren jakiten da gaitegia).

Dena dela, Gasteizko kasuan, batzuk muzin egin zioten euskaratik gaztelaniara pasatzeari, herritarron eskubideak defendatzeko helburuz. Eta egin zuten azterketa, iragan maiatzean izan zen. Desastre totala. Desastre totala azterketa bera. Mihiluzeko programa mordo bat bete daitezke akats horiekin guztiekin.

“Pertsona gortasun bat”. “Haragi-tamainako argazki bat”. “Atezaindegietako sareak”. “Txorrota batek ura darigu”. “Zerbitzubatutzara”. 

Ene... Guri bai darigula kaka zerutik.

Aitortuko dizut erredakzioan barrez lehertu ginela Zigorrek azterketa erakutsi zigunean. Malkotan hasi ginen. Baina egia esan, negar malkoak behar lukete izan.

Atzo arratsaldean Gasteizko Udalarekin hitz egin ahal izan zuen Zigor lankideak. Galderak euskaraz helarazi zizkion, eta hara hor, gaztelaniaz soilik jaso dugu erantzuna. Onartu dute “itzulpena” ez zela “zuzena” izan, baina esan digute “kontutan hartu” behar dela gaztelaniazko enuntziatuetan ere akatsak atzeman zituztela, eta inportantea dela “testuingurua”, epe laburrean prestatu behar izan dituztelako beste lan deialdi batzuetarako beste 50 azterketa-eredu. Honela finitzen du: “Bolumen horren aurrean, akatsak egitea gerta daiteke, kasu honetan bezala, baina zailtasun horiek azaltzeaz ez du esan nahi justifikatzen direnik”.

Soluzio gisa, azterketa egiten ari ziren unean adierazitako kexak medio, euskarazko eredua egiten ari zirenei gaztelaniazkoa ere eman zitzaien, “kontrastatu” zezaten ea ondo ulertzen zuten euskarazko enuntziatua.

Tira, horrelaxe kontuak. Larunbatean Iruñera joateko motibo bat gehiago, hizkuntza politiketan jauzia eman dadin.

Kazetaritza independentea estimatzen baduzu, animatu proiektua babestera.

Mundiala

Gaur hasiko da gizonezkoen Munduko Futbol Kopa, eta uztailaren 19an amaituko. AEBetan, Mexikon eta Kanadan jokatuko da. Baina azken bi herrialde horiek nahiko isilean ari dira geratzen, eta hala geratuko dira, itzalpean utziko baititu gizon laranjaren dirdirak. Eta ergelak, ergela lagun. Trumpen bihotzeko laguna da FIFAko buru Gianni Infantino. Bien artean antolatu dute datozen egun eta asteetako espektakulu antzua eta inoizko kutsakorrena. 

Baina tranpa da Trump eta Infantinoren artekoa adiskidetasun harreman batera mugatzea. Ez baita soilik hori. Atzean geopolitika dago, eta botere-harremanak. Infantinok zergatik hartu zuen parte, bada, iragan urtarrilean egin zen Davoseko Munduko Ekonomia Foroan? Hilabete lehenago gainera, akordatzen ez bazara, FIFAk Bakearen Sari bat asmatu zuen Trumpi emateko... Eragile bat gehiago da FIFA mundu nahasi honetan. “Kirolik demokratikoena” omen futbola, Israel eta Palestina “baketu” egingo dituena… Trumpen hiztegia darabil FIFAk.

Horri buruz idatzi du artikulua Jon Torner lankideak, baita ere, besteak beste, partidak ikusteko pagatu behar denaz. Merkeena 350 euro, Mexikoko herritar arrunt baten hilabeteko soldata osoa. Hortik aurrera, auskalo noraino. Zeren, “sarrera dinamikoak” kontzeptua sortu dute: eskaeraren arabera prezioak erreparorik gabe garestitzeko sistema da. Eta birsalmentak, aldi berean, izugarrizko presentzia du.

• Bide batez. Futbol epaile somaliar batek Munduko Kopan egin behar zuen lan, baina AEBek ez diote utzi herrialdean sartzean. Aduana zerbitzuek gerarazi dute, eta atzera bueltan bidali, argudiatuta “arazoak” izan dituztela epaile horren “aurrekariak egiaztatzerakoan”. Afrikako epaile onenaren izendapena jaso zuen iaz. 

·····>   Ez galdu hauek

• Donostia-EHU Leioa. Gipuzkoako Aldundiko alderdi bazkideek Gipuzkoako Aldundiari eskatu diote autobus publikoa jar dezala Donostia eta EHUren Leioako campusa elkar lotzeko. Aspaldi-aspaldiko eskakizuna da. Orain arte, hainbat urtez, ikasle taldeek antolatzen zituzten autobus pribatuak. Dena dela, ikasleak ez dira ase: EAJk eta PSEk ez baitute ez proiekturik aurreikusi, ezta eperik aipatu ere. 
   
• Marienia. Ardiak sartu dituzte Kanboko Marieniako lurretan. Dokumentu administratiboetan “eraikigarri” gisa sailkatuta daude lur horiek, baina herritarrak proiektuaren aurka daude, baita auzapez berria ere (kanpainan esan zuen), Peio Etxeleku. Dokumentazioa aldatzeko eskatzen diote ELBk, Ostiak eta Lurzaindiak, laborantza lur izendatzeko.

Eta irakurgai luzexeago bat:

• CAFi kereila. Duela bi hilabete kontatu genuen Euskal Herriko, Kataluniako eta Espainiako hainbat gizarte eragilek kereila aurkeztu ziotela CAF enpresari, Palestinako kolonizazioaren esku hartzen duela arrazoituta. Fiskaltzak auzia onartu du, eta ikerketa zabalik da. Kereila ipini duen eragileetako batekin hitz egin dugu.

Honaino gaurkoa.

Egun ona izan. Besarkada bat.