Egun on.

Itzuli naiz lanera, atseden hartuta eta oporrez gozatuta.

Faltan sumatu al duzu buletina pasa den astean? Bateren batzuek esan didazue baietz. Hori esate hutsa polita iruditu zait. Eskertzen da. Finko-finko eta jarraikortasunez irakurtzen baituzue askok.

Atzo arratsaldean sartu ginen udan, eta hona hemen, beraz, uda honetako lehen buletina.

Goazen mamira.

Nortzuk dira ‘erradikalak’?

Larunbat arratsaldean, Bilbon, milaka herritar manifestatu ziren Ertzaintzaren “inpunitatea” salatzeko. Oso epe motzean gertatu dira Global Sumud Flotillako ekintzaileen aurkako karga polizialak, Gasteizko Errekaleor auzoan eta inguruko pabilioitan egindako esku hartze gogorrak, Bilboko Etxarri II gaztetxearen hustean barrabila galdu zuen Iker Aranaren kasua, edota Sestaon ere Ertzaintzaren jipoiaren ondorioz barrabileko ebakuntza egin zioten gizonarena, Errealeko zaletu Amaya Zabarteren auzia, Tolosako inauterietan begian pilotakada jaso zuen Xuhar Pazosena, Gasteizen pilotakada batek Aritz Ibarrari masailezurra hautsi zionekoa…

Ertzaintzaren indarkeria azken boladan pairatu duten 11 taldek eta norbanakok antolatu zuten iragan larunbateko manifestazioa, 200 eragile baino gehiago batu ziren deialdira, eta milaka herritar juntatu zitzaizkien. Ertzaintzak inpunitatez jokatzen duela salatu zuten, eta premiazkoa dela errepresioari mugak jartzea. Batik bat fokua Ertzaintzarengan eta Bingen Zupiria sailburuarengan jarri bazuten ere, azpimarratu zuten Foruzaingoak eta Espainiako eta Frantziako Poliziak ere berdin-berdin jokatzen dutela, eta han-hemen errepresioa jasaten dutela kide ugarik.

Esan dizut: 200 eragile baino gehiago batu ziren deialdira. Horiek denak zaku berean sartu ditu oraingoan ere El Correo egunkari eskuindarrak, radicales (erradikalak) etiketapean. Denak dira “talde erradikalak”. Eta manifestaziora joan ziren guztiak ere bai, artikulua irakurrita ulertarazten denez. Zeren, “txakurra” eta “zipaio” deitu zioten Zupiriari, “lotsa emango lidake polizia izatea” mezua ere ikusi zuen kazetariak manifestazioan, baita “inor ez da ilegala” ere, migratzaileei egindako keinu gisa, etorkinen taldeak ere bazeuden-eta manifestazioan, errepresio galanta jasaten dute-eta nabarmenki Bilbon. 

Kazetaritza fineko jarduna iruditu zait Berria egunkariak asteburuan egin duena: manifestazioaren bezperan, izen-abizenak ematen ausartu ez diren bi ertzain kritikorekin hitz egin dute. Ertzaintzaren barruan autokritika gabezia larria dagoela esan dute, besteak beste, Loiukoa gehiegikeria izan zela, “esku hartze hori ez dago defenditzerik”. Interesgarria (eta aldi berean sumatzen zena) da hau: “Badago barne kritika bat ertzainen artean esku hartze batzuen harira, baina gehienek nahiago dute isilik egon, zenbait esparrutan hobe baita zuhurtziaz aritzea”. 

Jaso nahi duzuna. Ordaindu nahi duzuna.

·····>   Ez galdu hauek

Egunkari talde horretatik arrantzatu ditudan bi notizia. Gehien irakurrienak, bide batez. Eman dezala horrek zer pentsa.

• Luxuzko kotxeak. Aston Martin Valour modeloa (munduan 110 soilik omen daude) aparkatuta ikusi dute Donostiako Maria Cristina hotelaren aurrean. Bideoak, argazkiak... Jendea txoratu egin omen da. Eta antzera Zumaian. “Super-luxuzko” sei auto aparkatu dituzte herri erdian, Ferrariak, Mclarenak eta Porcheak. 
   
• Donostia lider. “Bartzelona gainditu du”. Batez beste, urtarriletik apirilera bitartean, Donostiako hotel batean gaua pasa nahi baduzu, 178 euro pagatu behar dituzu. Eta hori neguan; ez udan. 

Eliteko turismoaren adibideetako bi dira. Hau Donostiako Bizilagunekin taldekoei irakurri diet: aberatsen turismoak ez ditu beharbada jende pilaketak eragiten, hainbeste zabor eta zarata sortzen, baina turisitifikazio eredu kaltegarriagoa izan daiteke, etxebizitzaren eta kontsumo prezioak askoz ere gehiago garestitu daitezkeelako.
 

Bestalde:

• Yadan legea. Lege-proiektuak “terrorismoa gaitzesteko helburua” duela dio Frantziako Gobernuak, baina funtsean kaltetu egingo ditu adierazpen eta protesta eskubideak. Hau da, Palestinari elkartasuna adieraztea adibidez, egun baino askoz ere errazagoa izango da “antisemitismoa” leporatuta zigortzea. Protesta egin zuten larunbatean Baionan. 
   
• Biriatun hauteskundeak. Errepikatu egin beharko da herriko etxerako bozketa. Biriatun Bizi zerrendako Odile Cornu auzapez hautatua izan zen 17 botoren aldearekin, hiru hamarkadaz auzapez izan den Michel Hiriarterekiko, eta azken horrek helegitea aurkeztu zuen, zenbaketa ez zela “baldintza egokietan” egin esanez. Paueko Auzitegiak onartu egin du. Kasu bertsu gehiago ere badira, baina fiskaltzak ez du bat bera ere onartu. 
   
• Iñaki Dorronsoro. Ataundar euskaltzalea hil da, Eusko Ikaskuntzako lehendakari izandakoa. Ingeniari industriala, enpresa munduan bezalaxe akademian eta euskalgintzan ere aritua. Azken urteotan, Gaindegia Euskal Herriko ekonomia eta gizarte garapenerako behategiko lehendakaria izan da. 
   
• Keir Starmer. Kolokan dago Erresuma Batuko lehen ministroa. Hango hedabideek diote astelehen honetan aurkeztuko duela dimisioa, Manchesterreko alkate ohi Andy Burham alderdikideari bidea libre utzita. Hain justu, bihar beteko dira hamar urte Europar Batasunetik irten zirela; dimisioak ohiko bihurtu dira ordutik.
   

Atzo, udako solstizioaren eguna, Musikaren Festa ere izan zen.

• Zetak. Mitoaroa III izenean, bi emanaldi egin ditu asteburuan Bilboko San Mamesen. Guztira 80.000 ikus-entzule bildu ditu ikuskizunak. Trilogia amaituta, beste emanaldi baten berri eman du: Km0. Gasteizko Buesa Arenan izango da, sei hilabete barru.
   
• Pantxoa eta Peio. Adarra Saria jaso zuten atzo Donostian, Victoria Eugenia antzokian. Garaikurraren ostean, kontzertua eskaini zuten.

Honaino gaurkoa.

Astelehen ona izan. 

Besarkada bat.