Argazki hori iazkoa da.
Atzo egin zuen EHUk kurtso akademikoaren inaugurazioa, eta Imanol Pradales lehendakaria ez da joan. Estreinako aldia da lehendakari bat ez dela joaten. Zeren, lehendakari honek esan du txandaka egingo duela Deusto, Mondragon eta EHUren artean. Alegia, pareko bezala ikusten dituela bi unibertsitate pribatu eta unibertsitate publikoa. Hori da lehendakari honek egin digun benetako argazkia.
Ostegun goiza Eusko Legebiltzarrari hizketan pasako du Pradalesek eta entzun beharko da zerbait esatekorik duen gai horretaz. Ez dut uste. Hor esango du zein den, oro har, egoera politikoaz egiten duen argazkia. Eta usaindu dezakegu hitzaldiaren parterik handiena bideratuko diola EAJk askatu ere egiten ez dion gaiari, segurtasunari, "benetako errealitateari". Nola nabari den hauteskunde zikloa datorrela, ezta?
Eta Madrilen, bien bitartean, nork sinesten du CIS inkesta etxearen prospekzioa, PSOEk botoen %31 lortuko lukeela eta PPk %25? Zeinentzat da erreala argazki hori?
Garai hauen adierazle den irudi bat ikusi da gizonezkoen US Open teniseko finalean. Alexander Zverev jokalaria ez da ohartu irabazi egin duela, eta puntua egin ostean berriz ere sakea egitera joan da, publikoa oihuka hasi eta epaileak zorionak eman dizkion arte. Horrela ohartu da, markagailua begiratuta.
Bazirudien ekinean eta ekinean ikusten duzun lagun hori dela, ohartzen ez dena nola doan, burua altxatu gabe, intuizioari, senari edota bihotzari segika. Sufrikarioaren eta tematzearen artean dabilena; sinpleki, egiten duen horretan sinesten duelako. Gazako argazkilaria bezala. Bere argazkia deskargatzeak 145 euro balio ditu Shutterstock artxibo ezagunean, baina berak 0,30 euro ikusten ditu hortik. Hain sinple eta hain gordin. Baina segituko du horretan, zentimo horietatik bada ere bizi behar duelako, baina baita munduari krudelkeria erakutsi nahi diolako ere.
Badu tranpa, eta hori da Shutterstocken bigarren negozioa, negozio are zikinagoa: argazki bakoitza nondik igo den erregistratuta gelditzen da nahitaez, enpresak gero datu horiek saldu egiten dituelako. Kasuon, Israelgo armadari. Hala hil dituzte ehundik gora kazetari.
