Egun on.

Ez dizut gezurrik esango: ordu asko daramatzat Donostiako Zinemaldiaren bueltan eta apur bat kostako zait aste honetako buletinetan fokua hortik aldentzea. Hala ere, Brad Pittek “hiria irauli eta konkistatu” duela ez dizut kontatuko Gipuzkoako egunkaririk salduenak dioskun bezala. Hor zehar entzun dudan moduan,“bere semeek ere ez badute ezertxo ere jakin nahi berari buruz, bost axola beharko liguke tipo honek”.

Orain arte film onak ikusi ditut Donostian, eta horietakoren bat ekarriko dizut buletin bakoitzero, behean. Hortik aparte, ate joka ditugu bestelako notiziak.

Goazen mamira.

Aterperik xumeena ere

Ba, hori ere ez: hobe kalean lo egitea, hutsik dagoen eta auzotarren baimena duten lokal batean baino. Horixe gertatu da Gasteizen maliar migratzaileekin. 

Sekulako arazoa dago Arabako hiriburuan, Espainiako Poliziaren komisaria aurrean batik bat. Maliko gerratik ihes heldutako pertsona ugari daude hor, aspalditik, asilo eskaera bideratu nahian, eta ezinean, administrazioa gaindituta baitago, burokraziak itota. Txanda hartzera joan, eta “ez dago aukerarik”. Eta beraz, barrura sartu eta “gaur ez dugu lekurik, etorri bihar ea”. Horrela etengabe-etengabe. 

Salburuako auzotarrak duela urtebete inguru hasi ziren elkartzen, ikusita maliar ugarik hilabeteak zeramatzatela komisaria aurrean, eta negua heltzen ari zela. Lotarako hainbat leku lortu zituzten: tartean, auzo elkartearen egoitza. Orduz geroztik, iluntzero auzoko pertsona batek ireki die atea, koltxoiak bota eta lotarako gauzak eman, eta goizero beste auzotar batek zabaldu die, irten eta komisariara gerturatu ahal izateko. Gaueroko errutina horixe izan da, orain arte. Gasteizko Udalak “harrapatu” egin ditu. Mehatxu egin diete, lokala bera eta dirulaguntzak kenduko dizkietela esanez. Auzotarrek esan dute larrialdi egoera bati erantzuten ari direla, ez dela berez elkartearen “ohiko jarduna”, bestela legedia urratzen ariko zirelako. Baina udalak ezetz, amaitu dezatela egiten ari direna. 

Gaia nahiko bero dagoela kontatu digu Zigor Olabarria lankideak.

· · · · · · ·

Tira, eta beharra dutenak laguntzeaz hitz eginda, begira Donostiako irudi hauek Plaza Berrian, larunbatekoak, zineko alfonbra gorria eta guzti. Desfile bikaina Kaleko Afari Solidarioak taldearen elkartasuna txalotzeko.

Eta bide batez, Donostian segituta, baina alfonbrarik gabe oraingoan, behiak atera dituzte kalera Kontxako pasealekuan, Alderdi Ederren.

Gipuzkoako abeltzainen protesta izan da, lehortearen eraginei aurre egiteko neurri eske. Besteak beste, bazka erosketa bateratu bat egitea eskatzen zioten sindikatuek Eusko Jaurlaritzari, prezioak izugarri igo direlako; eta itxura zuen egingo zela, hala zirudien uda hasieran, baina kontrako bidea hartu zuen Jaurlaritzak gero.

Kazetaritza independentea estimatzen baduzu, animatu proiektua babestera.

·····>   Ez galdu hauek

• Miren Artetxe. Hazparnen, Euskal Herriko Bertso Txapelketako lehen saioa irabazi du Hendaian jaiotako bertsolariak, aise egin ere. Bigarren egin du Maddi Ane Txoperenak, jauzi batera segidan Xabat Galletebeitia, eta hortik beste koska batera Unai Anda, Peru Abarrategi eta Eki Mateorena. Hona kronika ederra, Berria-ko Iratxe Muxikarena. Datorren asteburuan bi saio jokatuko dira, Altsasun eta Lekeition. 
   
• Groenlandia. Danimarkaren menpeko lurraldea da, AEBek adierazi izan dute bereganatzeko nahia. Bada, bi gobernuek “segurtasuna bermatzeko akordioa” sinatuko dute aste honetan: itxuraz yankiek armada militarra nahieran zabaltzeko eskubidea izango dute, baina lurraldearen “jabetza” Danimarkarena izango da.
   
• Berlin, Die Linke. Garaipen handia ezkerrarentzat Alemaniako hiriburuan: lau bototik bat jaso ditu atzoko hauteskundetan, eskualde mailakoetan; eskuin muturrak baino bi aldiz gehiago. Aldiz, Mecklenburg-Pomeranian, kontrara, AfD aise nagusitu da, botoen %40 jasota. Merz kantzilerraren CDU alderdia ozta iritsi da %5era.

Zer iruditzen diseinua berri tenporal hau? Maialen Aranak egina da. Niri asko gustatu zait.

Jo, bost minutu gehiago, mesedez. Hori da iratzargailuari eskatzen dioguna. Amari esaten diogun enegarren “itxoin”-arekin batera doana. Edota bilerako kideari gure beranta justifikatzeko adierazten dioguna. Baina kasu honetan ez da nahi edo premiaz egindako eskaera, baizik eta kontrakoa, buka dadila infernua. 

Gaira: asko gustatu da Javier Ruiz Calderak zuzendutako 5 minutos más pelikula eta ikusi ez baduzu apuntatu nonbait, hartu gogoan, gustatuko zaizu-eta. 

Berto Romero kataluniarraren gidoia eta presentzia du pelikulak, bera baita protagonista, Belén Cuestarekin batera. Thriller komiko fantasiosoa da. Bikote dira, arazoak dituzte harremanean, eta horiek konpontzeko, lasaitzeko edota ganorazko denbora igarotzeko, landa inguruneko etxe galant batean pasatu asmo dute asteburua, estaldurarik eta telebistarik gabeko leku batean. Baina egon: etxean instalatu bezain pronto, asteburua disfrutatzen hasi aurretik, munduak atzera egingo du. Hau da, 18:35ak direnean, 18:30ean zeuden lekura itzuliko dira. Eta horrela etengabe, bukleak eta bukleak. Baina ez da erabat atzera egiten, eta hemen dago gakoa: tarte horretan egiten dituzten ekintzek eragina dute.

Esango nuke izan dela film bakarrenetakoa jendea adi-adi eta aldi berean irribarre betean egon dena emanaldi osoan. Zeren, Kursaalen ingurumarian komentatzen ari den bezala, uste dut aurtengo Zinemaldian nabarmena ari dela izaten jendeak mugikorra atera eta mezuak erantzuten jartzea. Gero esango dugu PISAko emaitzengatik, pantailen dependentziagatik-eta.

Tira, 5 minutos más pelikula. Urtarrilean estreinatuko da, beharbada zine aretoetan edo zuzenean Movistarren, bera baita ekoizlea. Hemen duzu Eneko Atxa gure kritikariaren artikulua.

Honaino gaurkoa. Bihar albiste eta zine gehiago.

Astelehen ederra izan.

Besarkada bat.